«Prokýrorlyq súzgi» tetigi Abaı oblysynda «Eıkos» JSHS-niń negizsiz ákimshilik jaýapkershilikke tartylýynyń aldyn aldy. Kompanıa aımaqta shına qaıta óńdeý jobasyn júzege asyrýda, dep habarlaıdy infohub.kz saıty.
Qadaǵalaý organynyń baspasóz qyzmetinen málim etkendeı, Bas prokýratýranyń Investorlar quqyǵyn qorǵaý komıteti úılestiretin tetik iske qosyldy.
Prokýratýraǵa kelisýge Saýda jáne tutynýshylar quqyǵyn qorǵaý departamentiniń kompanıany tutynýshylar quqyǵyn qorǵaý zańnamasyn buzǵany úshin jaýapkershilikke tartý týraly qaýlysy tústi. Alaıda tekserý buǵan negiz joq ekenin kórsetti. Prokýratýra kelisim berýden bas tartyp, ınvestorǵa qatysty ákimshilik qýdalaýdy toqtatty. Qaýlyny daıyndaǵan laýazymdy tulǵa tártiptik jaýapkershilikke tartyldy.
Ónerkásip mınıstrliginiń dereginshe, salynyp jatqan kásiporynnyń qýaty jylyna 5,7 myń tonna qaıta óńdelgen shınany quraıdy. 2024 jyly jarıalanǵan joba quny — 2,3 mlrd teńge. Investor sondaı-aq 100 jańa jumys ornyn ashýdy josparlap otyr.
Zaýyt termıalyq jáne mehanıkalyq qaıta óńdeý ádisterin qoldanady. Jylyna 12 myń tonna paıdalanylǵan shınadan: 600 tonna pesh otyny, 600 tonna brıkettelgen granýlát, sonsha joǵary legırlengen bolat sym, 6300 tonna ártúrli fraksıadaǵy rezeńke túıirshikteri, 1500 tonna metal kord jáne 1600 tonna toqyma talshyǵy alý josparlanýda. Rezeńke úgindisi plıtka, sýarý shlangtary, sporttyq jáne balalar alańdaryna arnalǵan jabyndar, sondaı-aq avtomobıl aksesýarlary men modıfıkasıalanǵan bıtým óndirý úshin qoldanylady. Zaýyt sonymen qatar munaı tógilýinen sý betterin tazartýǵa arnalǵan materıaldar shyǵaratyn bolady.
«Prokýrorlyq súzgi» tetigi Qazaqstanda 2024 jyly prezıdenttiń tapsyrmasy boıynsha ınvestorlardy memlekettik organdardyń negizsiz sheshimderinen qorǵaý úshin qurylǵan. Investorǵa qatań shekteýler nemese aıyppuldar qoldanar aldynda memlekettik organ prokýratýranyń kelisimin alýy tıis.
«Ákimshilik kedergilerge tap bolǵan ınvestorlar Abaı oblysy prokýratýrasyna +7 707 144 00 16 telefony nemese 115 Call-ortalyǵy arqyly júgine alady», — dep atap ótti baspasóz qyzmetinde.
Buǵan deıin «Prokýrorlyq súzgi» Aqmola oblysynda sátti jumys istep, 5,8 mlrd teńge turatyn taý-ken baıytý kombınatyn salyp jatqan «Qazaq Kaolin» JSHS-ne qatysty zańsyz tekserý júrgizgen laýazymdy tulǵalar jazalanǵan bolatyn.