Máskeý oblysyndaǵy Istra ózeniniń jaǵasyndaǵy reseılik ánshi Alla Pýgachevaǵa tıesili jer telimderi sımvoldyq baǵaǵa satyldy. Saýda-sattyq ótip, jeńimpaz buryn bul jerge menshik zańdylyǵyn tekserýdi bastaǵan kásipker atandy, dep habarlaıdy infohub.kz saıty.
2025 jyldyń qarashasynda kásipker Gleb Ryskov Prımadonnaǵa shaǵym túsirip, onyń Istra sý qoımasyndaǵy Malye Berejkı aýylyndaǵy úıiniń janyndaǵy jaǵalaý aımaǵyn zańsyz ıelenip otyrǵanyn málimdedi. Resvodresýrstar júrgizgen tekserý bul dálelderdi rastap, materıaldar Bas prokýratýraǵa joldandy.
Sot talqylaýynyń nátıjesinde Pýgacheva jer telimderin aýksıon arqyly satýǵa mindetteldi. Jerdiń jalpy aýdany Istra ózeniniń jaǵalaý syzyǵynyń 2,5 myń sharshy metrin qurady. Jalǵyz qatysýshy Ryskov bolǵan saýda-sattyqta lot 14 myń rúblge (shamamen 77 myń teńge) satyldy. Alaıda, básekelester bolmaǵandyqtan, jeńimpazben kelisimshart satýǵa emes, 2036 jylǵa deıin sý paıdalanýǵa jasaldy. Osylaısha, kásipker jer telimderin on jylǵa paıdalanýǵa aldy jáne munda ıahta klýbyn uıymdastyrýdy josparlap otyr.
Eske salaıyq, Pýgacheva men onyń otbasy 2022 jyldyń qazanynda Reseıden ketkennen keıin ánshi men Maksım Galkınniń Máskeý túbindegi Gráz aýylyndaǵy saraıyn tárkileý týraly usynystar mezgil-mezgil aıtylyp turady. Bul úı-múlik reseılik kásipker jaqynda satyp alǵan jaǵalaýdaǵy jer telimderinen shamamen 65 shaqyrym jerde ornalasqan.
Kóptegen baqylaýshylar jerdiń arzan baǵaǵa satyp alynýy juldyzdy juptyń múlkin tárkileý prosesiniń basy bolýy múmkin dep sanaıdy. Ryskovtyń ózi jaqyn arada Pýgachevanyń Malye Berejkıdegi úıiniń ózin berýdi talap etpek, sebebi ánshiniń saıajaıyndaǵy kóptegen qurylystar zańsyz salynǵan dep esepteıdi.
Saratovtan shyqqan kásipker Gleb Ryskov tanymal adamdardyń menshik quqyǵyna daý aıtý áreketterimen tanymal. Buǵan deıin ol Fılıpp Kırkorovtan Máskeý ózenindegi jeke jaǵalaýdy sot arqyly tartyp alýǵa tyrysqan, sondaı-aq Morgenshternnen Kishi Istra ózeniniń jaǵalaý beldeýin alýǵa umtylǵan. Larısa Dolınaǵa qatysty Máskeý oblysynda toǵan salýǵa baılanysty prokýratýraǵa aryz bergen.
Buǵan deıin Kursiv LifeStyle Pýgachevanyń sahnaǵa oralýyn joqqa shyǵarmaıtynyn jáne Kıevte óner kórsetýdi armandaıtynyn habarlaǵan.