Алматылық «Қалжыр Gold» компаниясы Шығыс Қазақстан облысы Күршім ауданындағы Қаражал учаскесінде шашыраңқы алтын іздеуді жоспарлап отыр. Бұл туралы жоспарланып отырған қызмет туралы мәлімдемеде айтылған, деп хабарлайды infohub.kz сайты.
«Жоспарланып отырған жұмыстардың мақсаты – Қаражал өзені маңындағы шашыраңқы кен орнын іздеу және бұрын игерілген кеніштерді қоса алғанда, анықталған нысандардағы шашыраңқы алтын қорын бағалау», – делінген «Курсивтің» қарамағына түскен жоба бойынша қоғамдық тыңдауларға арналған құжатта.
Компания барлау лицензиясын 2026 жылғы 26 ақпанда алған, оның қолданылу мерзімі – алты жыл. Ең жақын елді мекен – Үшбұлақ ауылы – учаскеден 12 км солтүстікте орналасқан. Асфальтталған жол учаскеден 38 км қашықтықта, Қаратоғай ауылының маңынан өтеді, қалған жолдар – кәдімгі үзік-үзік дала жолдары.
Лицензиялық алаң шегіндегі ең перспективалы учаскелер Қаражал-Қойшылық бассейнінде анықталған. Ашық дереккөздерде Қойшылық бұлағына құятын Қаражал бұлағы туралы еске алынады. Тұжырымдар қолда бар тарихи материалдарды – есептер мен мұрағат деректерін алдын ала талдау негізінде жасалған.
Іздеу шурфтары мен орларды экскаватормен және тиегішпен қазу жоспарлануда. Барлығы 1085 текше метр көлемде және тереңдігі 4 метрге дейінгі 152 шурф қазылмақ. Орлардың ұзындығы 250 метр, тереңдігі 2,5 метр болады.
Жалпы салмағы 21912 кг болатын 1245 сынама алу көзделген. Бір сынаманың ұзындығы 50 см, салмағы 17,6 кг. Барлық геологиялық-барлау және зертханалық жұмыстар, зерттеулер мен деректерді өңдеу 2027–2031 жылдары жүргізіледі.
Алматылық «Қалжыр Gold» компаниясының жетекшісі әрі жалғыз иесі – Айдар Абиталиев. Ол сондай-ақ Алматыдағы Central Asia International Business Cooperation Center ұйымын басқарады, оның тең иелері – Айдар Абиталиев пен Мао Липинг.