Qazaqstanda «CVK» qarjy pıramıdasyn uıymdastyrýshylardyń 474 myń USDT kólemindegi sıfrlyq aktıvteri tárkilendi. Bul soma 212 mln teńgege teń. Qarjylyq monıtorıń agenttiginiń málimetinshe, qarajat memleket kirisine tústi, al sqemany uıymdastyrýshy sotty boldy, dep habarlaıdy infohub.kz saıty.
QMA dereginshe, qazaqstandyqtarǵa joq vırtýaldy dúkenderdi satyp alýdy usynyp, kúndelikti tabys pen jańa salymshylar úshin bonýstar ýáde etilgen.
«Jobaǵa qatysýshylarǵa 120-dan 49 myń AQSh dollaryna deıingi quny bar vırtýaldy dúkenderdi alý úshin USDT krıptovalútasymen aqsha salý usynyldy. Onyń ornyna olarǵa kúndelikti tabys pen jańa salymshylardy tartqany úshin qosymsha bonýstar ýáde etildi», — dep habarlady QMA.
Alaıda vırtýaldy dúkenderde ornalastyrylǵan taýarlar shyn máninde joq edi. Tabys alý jańa qatysýshylardy tartýǵa jáne olardyń aqsha salýyna táýeldi boldy. Salymdar OKX platformasy arqyly USDT krıptovalútasymen elektrondyq ámıandarǵa aýdaryldy.
Jedel is-sharalar barysynda 474 myń USDT kólemindegi krıptoaktıvterdi, ıaǵnı 212 mln teńgeni, qatyryp úlgerdi. Sot osy sıfrlyq aktıvterdi memleket kirisine tárkileýge úkim shyǵardy.
Qarjy pıramıdasynyń qurylymdyq bólimshesin uıymdastyrýshy Qaıyrbaev S.Sh. tárkileýmen qosa eki jylǵa bas bostandyǵynan shekteý jazasyna sottaldy. Úkim zańdy kúshine endi.
Buǵan deıin QMA-nyń jalǵan qyzmetkerleri Ońtústik Qazaqstandaǵy medıkten 15 mln teńge talap etkeni habarlanǵan bolatyn.