Almatyda Qazaqstan-Qytaı bıznes-forýmy aıasynda Prezıdent Qasym-Jomart Toqaevtyń qatysýymen elimizde árqaısysy 500 MVt bolatyn eki jel elektr stansıasyn salý týraly kelisimge qol qoıyldy. Qujat «Samuryq-Qazyna» quramyna kiretin «Samuryq-Energo» kompanıasy men qytaılyq China Energy Overseas Investment Co., Ltd. jáne SANY Renewable Energy Co., Ltd. arasyndaǵy ýaǵdalastyqty bekitti, dep habarlaıdy infohub.kz saıty.
Qujatqa «Samuryq-Energo» basqarma tóraǵasy Qaırat Maqsutov, China Energy Overseas Investment Co., Ltd. vıse-prezıdenti Lı Iahýn jáne SANY Renewable Energy Co., Ltd. sheteldik ınvestısıalar jónindegi bas dırektory Tan Chao qol qoıdy.
Joba 500 MVt-tan eki jel elektr stansıasyn, árqaısysynyń qýaty 150 MVt jáne syıymdylyǵy 300 MVtsaǵ bolatyn eki energıa jınaqtaý júıesin, sondaı-aq jalpy uzyndyǵy shamamen 800 km bolatyn 500 kV joǵary vóltty jelilerdi «Aqtoǵaı» jáne «Taldyqorǵan» qosalqy stansıalaryna qosýǵa arnalǵan. Alań Jetisý oblysynda ornalasady. Kelisim úsh jylǵa jasalyp, uzartý múmkindigi qarastyrylǵan.
Sonymen qatar Aqmola oblysynyń ákimi Marat Ahmetjanov pen SUNGROW Renewable Development Co., Ltd. kompanıasynyń Ortalyq Azıadaǵy bıznesti damytý jónindegi dırektory Sú Mın Feng óńirde jalpy qýaty 450 MVt bolatyn jel elektr stansıalary jobalaryn iske asyrý boıynsha yntymaqtastyqty bekitý týraly kelisimge qol qoıdy.
2025 jyldyń qorytyndysy boıynsha Qazaqstanda óndiriletin elektr energıasynyń jalpy kóleminde jańartylatyn energıa kózderiniń úlesi 7%-ǵa jetti. Respýblıka úkimeti bul kórsetkishti 2030 jylǵa qaraı 15%-ǵa, al 2050 jylǵa qaraı 50%-ǵa jetkizýdi mindet etip qoıyp otyr. Alaıda qazir qazaqstandyq elektr energıasynyń basym bóligi kómir jaǵý arqyly óndiriledi.