Bratıslavada jastar arasyndaǵy kúres túrlerinen álem chempıonaty (20 jasqa deıin) bastalyp, alǵashqy júldeler jıyntyǵy sarapqa salyndy. Grek-rım kúresinen synǵa túsken qazaqstandyq balýan Erkebulan Anapıa 77 kelige deıingi salmaq dárejesinde júldeli orynnan bir qadam ǵana qaldy, dep habarlaıdy infohub.kz.
Anapıanyń qola úshin beldesýge joly ózbekstandyq Ogarbek Askaralıevti 10:4 esebimen senimdi túrde utýdan bastaldy. Alaıda ekinshi aınalymda ol ázirbaıjandyq Djavıdan Nahmatovqa 5:7 esebimen ese jiberdi. Kúmis júlde úshin ótken kezdesýde qazaqstandyq grek Admantıos Papadatosty 8:1 esebimen tize búktirip, qola úshin beldesýge quqyq aldy.
Qola úshin sheshýshi beldesýde Erkebulannyń qarsylasy ırandyq Amır Mahdı Mohammad Saedı Nava boldy. Ol 5:3 esebimen basym túsip, jeńiske jetti. Osylaısha, Anapıa týrnırde tórtinshi orynǵa taban tiredi.
Qazaqstandyq basqa grek-rım balýandary — Dıas Kertaı (63 kg), Alıhan Tagaev (87 kg) jáne Bahtıar Kazıev (130 kg) — 1/8 fınal kezeńinde medalǵa talasýdan shyǵyp qaldy.
Slovakıa astanasynda Halyqaralyq kúres federasıasynyń (UWW) egıdasymen ótip jatqan jastar arasyndaǵy álem birinshiligine barlyǵy 700 jas sportshy qatysýda. Olar grek-rım, erkin jáne áıelder kúresinen 120 júlde jıyntyǵyn sarapqa salady. Bratıslavadaǵy jarysta Qazaqstan atynan 30 sportshy — 20 jigit pen 10 qyz — synǵa túsedi.
Jastar arasyndaǵy álem chempıonaty 23 tamyzǵa deıin jalǵasady.