Bratıslavada ótip jatqan grek-rım, erkin jáne áıelder kúresinen jastar arasyndaǵy álem chempıonatynyń sońǵy aldyndaǵy kúni qazaqstandyq balýan Nurasyl Asambek (57 kelige deıin) qola júldege ıe boldy, dep habarlaıdy infohub.kz.
Asambek júldege jetý jolynda birneshe senimdi jeńiske jetti. Alǵashqy beldesýde ýkraınalyq Abbas Hýseınovty 4:2 esebimen utsa, keıin fransýz Gaspar Kamıl Cheınýany 11:0 esebimen tize búktirdi. Shırek fınalda qazaqstandyq amerıkalyq Maıkl Kortesten 0:6 esebimen utylyp qaldy, alaıda jubanysh beldesýinde qytaılyq Chentao Vangty 10:5 esebimen jeńip, ózin aqtady. Qola úshin ótken sheshýshi beldesýde Asambek ózbekstandyq Ýlýgbek Rashıdovty 13:6 esebimen senimdi túrde utty.
Taǵy bir qazaqstandyq balýan Beıbarys Erǵalı (92 kelige deıin) de medalǵa úmitker bolǵan edi, alaıda tórtinshi orynmen shekteldi. Ol shveısarıalyq Iasek Fýdaleıdi 9:2 esebimen utyp, keıin ýkraınalyq Egor Gorohty bólek sheshimmen (3:3) jeńdi. Alaıda jartylaı fınalda grýzıalyq Sandro Kýrashvılıden 1:6 esebimen utylyp, úshinshi oryn úshin beldesýde amerıkalyq Djeıms Merle Mastnydan 2:3 esebimen jeńilip qaldy.
Eraly Askerbek (65 kelige deıin) pen Aıbek Qalıahmet (79 kelige deıin) alǵashqy kezeńderde utylyp, bul kúni medaldarǵa qatysa almady.
Týrnırdiń sońǵy kúni qarsańynda Qazaqstan quramasynyń qorjynynda tórt medal bar. Grek-rım kúresinen Qyzybek Qalmaǵambetov (67 kelige deıin) altyn, erkin kúresten Bekasyl Asambek (61 kelige deıin) kúmis, al Ýldana Tileýhan (68 kelige deıin) men Nurasyl Asambek qola júldege ıe boldy.
Halyqaralyq kúres federasıasynyń (UWW) egıdasymen ótip jatqan álem birinshiligine Slovakıa astanasynda 700 jas sportshy qatysýda. Olar kúrestiń úsh túrinen – grek-rım, erkin jáne áıelder kúresinen – 120 medal jıyntyǵyn sarapqa salýda.
Qazaqstan Bratıslavada 30 sportshymen ókildik etedi – 20 jigit jáne 10 qyz. Týrnır 23 tamyzda aıaqtalady.