Qazaqstannyń Damý banki 2 mlrd ıýánge deıingi nesıe jelisi týraly aldyn ala kelisim jasady. Bul shamamen 300 mln dollarǵa teń. Qarajat Qazaqstan ekonomıkasynyń basym salalaryndaǵy jobalardy, sonyń ishinde Qytaımen birlesken bastamalardy qarjylandyrýǵa jumsalmaq, dep habarlaıdy infohub.kz saıty.
China Construction Bank Corporation Astana Branch-pen 2 mlrd ıýánge deıingi nesıe jelisin ashýdyń aldyn ala sharttary týraly kelisim ınvestısıalyq forým barysynda jasaldy. QDB-da aıtqandaı, qarjylandyrýdyń túpkilikti parametrleri — somasy, paıyzdyq mólsherlemesi men merzimderi — ázirge belgisiz, olar boıynsha kelissózder júrip jatyr.
Tartylǵan qarajatty Qazaqstan ekonomıkasynyń basym salalaryndaǵy — energetıka, ónerkásip jáne kóliktegi — kapıtaldy kóp qajet etetin jobalarǵa, sonyń ishinde qazaqstan-qytaı birlesken jobalaryna baǵyttaý josparlanýda. Qarajat naqty jobalar maquldanǵan saıyn bólinetin bolady.
Sonymen qatar QDB-da Qytaıdyń qatysýymen birneshe iri jobanyń qazirdiń ózinde júzege asyp jatqanyn atap ótti. Atap aıtqanda, bank VIGOR Holding kompanıasynyń qýaty 70 MVt kún elektr stansıalary parkiniń qurylysyn qarjylandyrdy. Bul kompanıanyń eń iri aksıoneri — qazaqstandyq mıllıarder Vladımır Kımniń qurylymdarymen baılanysty top-menedjer Dınara Ýldanova.
Sondaı-aq Sauran Solar Power kompanıasynyń qýaty 300 MVt kún elektr stansıasyn jáne Karaganda Wind Power kompanıasynyń qýaty 500 MVt jel elektr stansıasyn salýǵa ótinimder qarastyrylyp jatyr. Bank portfelinde Qytaı kompanıalarynyń qatysýymen júzege asyrylatyn taǵy birqatar joba ártúrli kezeńde qaralýda.
China Construction Bank Corporation Astana Branch — Qytaıdyń eń iri bankteriniń biri China Construction Bank-tiń «Astana» halyqaralyq qarjy ortalyǵynda tirkelgen fılıaly.
Buǵan deıin «Báıterek» pen «Samuryq-Qazyna» Qazaqstan ekonomıkasyna 27 mlrd dollar baǵyttaıtyny habarlanǵan bolatyn.