Qazaqstannyń Aýyl sharýashylyǵy mınıstrligi jer qatynastary salasyndaǵy qyzmet kórsetý erejelerin qaıta óńdedi. Bul — qujattyń qazaq jáne orys tilderindegi nusqalaryndaǵy sáıkessizdikterdiń anyqtalýyna baılanysty, dep habarlaıdy infohub.kz saıty.
Ákimshilik ister jónindegi kasasıalyq sottyń málimetinshe, jer salasyndaǵy memlekettik qyzmet kórsetý erejelerinde normalardyń ekiushty túsindirilýi jáne tildik nusqalar arasyndaǵy sáıkessizdikter anyqtalǵan. Atap aıtqanda, kent nemese aýyl jerlerinen jer telimin berý, sondaı-aq jobalanatyn ýchaskeni Biryńǵaı memlekettik jyljymaıtyn múlik kadastrynyń aqparattyq júıesi derekterimen kelisý sıaqty suranysqa ıe qyzmetterge qatysty kelispeýshilikter bolǵan.
Sot zańǵa táýeldi aktiniń mátinderiniń birdeı emestigi tek termınologıaǵa ǵana emes, sonymen qatar qyzmet kórsetý tártibine, rásimderdiń merzimderine, qujattar tizbesine jáne tipti alýshylar sheńberine tikeleı áser etkenin anyqtady. Mundaı olqylyqtar zańnyń birkelki qoldanylmaýyna, quqyqtyq belgisizdikke jáne belgili bir táýekelderge jaǵdaı jasaǵan.
Qazaq jáne orys tilderindegi normatıvtik quqyqtyq aktiler qatań túrde teńtúpnusqaly bolýy tıis bolǵandyqtan, sot úkimet pen salalyq mınıstrlikke jekeshe qaýly shyǵarǵan. Osy qaýlyny oryndaý úshin Aýyl sharýashylyǵy mınıstrligi jedel túrde jańa quqyqtyq akt — 2026 jylǵy 3 sáýirdegi № 118 buıryǵyn ázirlep, memlekettik jáne jergilikti atqarýshy organdarmen kelisip, qabyldady.
Qabyldanǵan sharalar zańǵa táýeldi aktilerdiń nusqalary arasyndaǵy maǵynalyq jáne prosedýralyq sáıkessizdikterdi tolyǵymen joıdy. Endi jer telimderin alý jáne olardy kelisý rásimi ashyqtyq pen quqyq qoldanýdyń birkelkiligi qaǵıdattaryna qatań sáıkestendirildi, sondaı-aq azamattar men kásipkerlerdiń quqyqtary men zańdy múddeleriniń senimdi qorǵalýy qamtamasyz etildi, dep sendirdi sotta.