Qazaqstanda ónerkásipte qoldanylatyn gýmanoıdty robottar shyǵarý jobasy iske qosylmaq. Bul týraly infohub.kz saıty habarlaıdy.
Ǵylym jáne joǵary bilim mınıstrliginiń baspasóz qyzmetiniń málimetinshe, joba robototehnıkany, jasandy ıntellektti jáne ónerkásiptik óndiristi biriktiredi. Onyń maqsaty — elde menshikti tehnologıalyq jáne ınjenerlik quzyretterdi damytý.
Vedomstvonyń aıtýynsha, joba halyqaralyq AgiBot kompanıasymen birlesip júzege asyrylady. Bul kompanıa gýmanoıdty robottardy ázirleý men óndirýge, sondaı-aq Embodied AI (iske asyrylǵan jasandy ıntellekt) salasyndaǵy sheshimderge mamandanǵan. Seriktestik aıasynda Qazaqstanda tehnologıalardy lokalızasıalaý, ınjenerlik quzyretterdi damytý, ǵylymı zertteýler júrgizý jáne mamandar daıarlaý kózdelgen.
Ǵylym jáne joǵary bilim mınıstri Saıasat Nurbek vedomstvonyń mindeti daıyn tehnologıalyq sheshimderdi engizýmen shektelmeı, Qazaqstanda menshikti ınjenerlik jáne ǵylymı quzyretterdi qalyptastyrý ekenin atap ótti. «Gýmanoıdty robottar óndirisi ýnıversıtetterdi, ǵalymdardy jáne ındýstrıany birtutas tehnologıalyq tizbekke biriktiretin alańǵa aınalýy tıis. Bul — mamandar daıarlaý men ǵylymı zertteýlerden bastap tehnologıalyq sheshimderdi ázirleýge jáne olardy ónerkásipte qoldanýǵa deıingi tolyq sıkl. Bilim, ǵylym jáne óndiristi ıntegrasıalaýdyń dál osyndaı modelin keńeıtýdi kózdep otyrmyz», — dedi Nurbek.