24 tamyzda Qazaqstanda bes orman órti tirkeldi, dep habarlaıdy infohub.kz saıty.
Ekologıa jáne tabıǵı resýrstar mınıstrliginiń málimetinshe, órtter Aqtóbe, Qaraǵandy, Batys Qazaqstan jáne Qostanaı oblystarynda, sondaı-aq «Semeı» memlekettik orman tabıǵı rezervatynyń aýmaǵynda bolǵan.
Vedomstvo orman alqaptaryna áýeden de, jerden de turaqty monıtorıń júrgizilip jatqanyn atap ótti. Órt oshaqtary anyqtalǵan kezde orynǵa dereý qajetti kúshter men quraldar jiberiledi. Qazirgi ýaqytta ýchaskelerde orman sharýashylyǵy qyzmetkerleri men «Qazavıaormanqorǵaý» RMQK mamandary jumys istep jatyr.
Órt sóndirý toptarynyń basty mindeti — otty oqshaýlaý, onyń kórshiles aýmaqtarǵa taralýyna jol bermeý jáne órtti tolyq joıý. Sonymen qatar, mamandar órt ótken ýchaskelerde qaýipsizdikti qamtamasyz etý jáne qaıta órt shyǵýynyń aldyn alý jumystaryn júrgizýde.
Mınıstrlik turǵyndar men demalysqa shyqqandardy órt qaýipsizdigi talaptaryn qatań saqtaýǵa shaqyrdy: otty qaraýsyz qaldyrmaý jáne keter aldynda ottyń tolyq sóngenine kóz jetkizý.
Buǵan deıin «Kýrsıv» Borneo aralyndaǵy orman órtterin eriktilermen birge sóndirip júrgen 17 jastaǵy ındonezıalyq Rýdıans týraly habarlaǵan bolatyn. Ol jumysqa Sýpermen kostúmimen shyǵady. Qańtardan shildege deıin Indonezıada órt 200 myń gektardan astam jerdi joıdy, al El-Nınoǵa baılanysty qýańshylyq jańa órtterdiń shyǵý qaýpin arttyryp, olardy sóndirýdi qıyndatty.