Qazaqstanda jer qoınaýyn paıdalanýshylar úshin jańa tólemdi engizý eki jylǵa keıinge qaldyrylmaq: 2027 jyldan bastap engizilýi josparlanǵan qatty paıdaly qazbalarǵa roıaltı 2029 jyldyń 1 qańtarynan qoldanylýy usynyldy. Bul týraly infohub.kz saıty habarlaıdy.
Sheshim Salyq kodeksin engizý jónindegi jobalyq keńseniń otyrysynda talqylandy. Otyrysty Premer-mınıstrdiń orynbasary — Ulttyq ekonomıka mınıstri Serik Jumanǵarın tóraǵalyq etti.
«Salyq kodeksiniń jańa normalary mıneraldyq shıkizat pen qatty paıdaly qazbalardy, onyń ishinde óńdelgenderin ótkizý kezinde 2027 jyldyń 1 qańtarynan bastap roıaltı tóleýdi kózdeıdi. Bul ereje 2026 jyldyń 31 jeltoqsanynan keıin berilgen lısenzıalar boıynsha, buryn jer qoınaýyn paıdalaný quqyǵy berilmegen aýmaqtarda óndirilgen shıkizatqa qoldanylýy tıis edi», — dep naqtylady úkimette.
Ónerkásip jáne qurylys mınıstrligi birqatar máseleniń áli de qosymsha pysyqtaýdy qajet etetinin aıtady. Atap aıtqanda, tehnogendik mıneraldyq túzilimder úshin salyq bazasyn esepteý, roıaltıdi ákimshilendirý jáne mólsherlemelerdi aıqyndaý týraly sóz bolyp otyr.
Sondaı-aq jańa lısenzıalardyń erekshelikterin, jobalardyń kapıtal syıymdylyǵyn jáne ilespe komponentterdi óndirýdiń rentabeldiligin eskerý qajet. Bul máselelerdi ártúrli salalar arasynda kelisip, kásiporyndardyń qarjylyq-ekonomıkalyq modelderinde tekserý josparlanýda.
Buǵan deıin «Kýrsıv» Qazaqstan úkimeti geologıalyq zertteýler men perspektıvaly paıdaly qazbalar ken oryndaryn izdeýge 40,7 mlrd teńge bólgenin jazǵan bolatyn. Jumystar 2026-2028 jyldarǵa arnalǵan jáne altyn, mys, lıtı, sırek kezdesetin elementter men basqa da strategıalyq mańyzdy resýrstardy qamtıdy.