Qazaqstannyń soltústik jáne ortalyq oblystaryndaǵy qýańshylyq egin jınaý naýqanyna qaýip tóndirip, astyq ónimine táýekel týǵyzdy. Bul týraly úkimet otyrysynda Aýyl sharýashylyǵy vıse-mınıstri Azat Sultanov málimdedi, dep habarlaıdy infohub.kz saıty.
Vıse-mınıstrdiń aıtýynsha, qazirgi tańda egin jınaý naýqany eldiń barlyq óńirlerinde jalǵasýda. Alaıda bıylǵy maýsymdaǵy vegetasıa kezeńindegi aýa raıy jaǵdaıy birkelki bolmady: soltústiktiń keıbir óńirleri men ortalyqta jaýyn-shashyn mólsheri jetkiliksiz tústi.
«Sonymen qatar, úkimettiń qoljetimdi jeńildetilgen qarjylandyrý sharalarynyń arqasynda agrarlar qajetti agrotehnıkalyq is-sharalardy ýaqytyly ári sapaly júrgize aldy», — dedi Sultanov.
Budan bólek, Qazaqstanda bıdaı egisi qysqarýda. Basymdyq joǵary tabysty daqyldarǵa, ásirese maıly daqyldarǵa berilýde. Máselen, 2024 jyldan bastap maıly daqyldar alqaby 2,2 mln ga ulǵaıyp, 5,2 mln ga jetti (2024 jyly — 2,9 mln ga). Egis qurylymyndaǵy dándi daqyldardyń úlesi 72%-dan 66%-ǵa tómendese, maıly daqyldardyń úlesi 13%-dan 18%-ǵa ósti.
«Búgingi tańda 13,5 mln ga dándi daqyl, ıaǵnı 83%-y jınaldy, ortasha ónimdilik 14,7 s/ga. 19,9 mln tonna astyq bastyryldy», — dep qosty vıse-mınıstr.
Sultanov aýa raıy qıyndyqtaryna qaramastan, egin jınaý naýqany byltyrǵy qarqynnan ozyp kele jatqanyn atap ótti. Aýyl sharýashylyǵy mınıstrliginiń boljamynsha, astyqtyń qorytyndy jalpy jınalymy kópjyldyq ortasha kórsetkishten asyp túsedi. Jınalǵan kólem ishki naryqtyń azyq-túlik, mal azyǵy jáne tuqym qajettiligin tolyq óteıdi, sondaı-aq eksporttyq jetkizilimderdi saqtaýǵa múmkindik beredi.
Buǵan deıin «Kýrsıv» Qazaqstannyń negizgi astyq egetin óńirlerinde egin jınaý kezeńinde kúrdeli aýa raıy jaǵdaılary kútiletinin jazǵan bolatyn.