15 qyrkúıekte kóktem-jaz 2027 maýsymynyń Nú-Iork sán aptalyǵy aıaqtaldy. Onyń eń kóp talqylanǵan sátteriniń biri — podıýmǵa model de, kórsetilimge qatysýshy da bolmaǵan qazaqstandyqtyń shyǵýy boldy, dep habarlaıdy infohub.kz saıty.
Qazaqstannyń Nú-Iorktegi konsýldyǵy habarlaǵandaı, Manhetten podıýmdarynda úsh qazaqstandyq dızaıner — Tımýr Tursynqulov, Raýshan Anýarbekova jáne Sabına Volskaıa óz koleksıalaryn usyndy.
Tımýr Tursynqulov ashyq túster arqyly Qazaqstannyń mádenı murasyn kórsetti. Jas dızaıner nebári 22 jasta, biraq ol óz koleksıalarymen sheteldik sán aptalyqtaryna qatysyp úlgergen. Ras, olardyń barlyǵy jergilikti komersıalyq is-sharalar edi: Paris City Fashion Week, MadMood Milano Fashion Week, Mediterranean Fashion Week, Fashion Open Air Berlin. Dál osy tájirıbe oǵan álemdegi basty sán aptalyqtarynyń biri — NYFW-ge qatysýǵa múmkindik berdi.
Raýshan Anýarbekova 2023 jyly Mılan sán aptalyqtarynyń birine 60+ jastaǵy modelderdi shaqyryp, jurtshylyqtyń nazaryn aýdarǵan edi. Osydan keıin ol 2025 jyly Parıj jáne Mılan sán aptalyqtaryna «Álemdi tańqaldyrǵan qazaq ájeleri» atty biregeı mádenı jobasymen shaqyryldy. Egde jastaǵy modelder NYFW kórsetilimderine de qatysty.
Sabına Volskaıa haute couture klasyndaǵy balalar kıimine mamandanǵan. Dızaınerdiń úsh balasy bar, ony osy salaǵa úlken qyzy bastaǵan. Sabınanyń esebinde Italıadaǵy Milan Fashion Week qosa alǵanda, kóptegen sheteldik sán aptalyqtary bar.
Qazaqstandyq delegasıa shamamen 60 adamnan turdy. Onyń quramynda dızaınerler, modelder jáne production-komanda músheleri boldy. Kórsetilimderge Qazaqstan elshiliginiń ókilderi men Nú-Iorkte turatyn otandastar shaqyryldy.
Este qalǵan sátterdiń biri — bloger Jasulannyń podıýmǵa kútpegen shyǵýy. Óskemendik er adam birneshe jyldan beri Instagram-da AQSH-taǵy ómirdi kórsetip júr.
«Men ádemi koleksıalardy, sonyń ishinde bizdiń dızaınerlerdiń de jumystaryn kórdim, biraq negizinen áıel obrazdary boldy. Al Qazaqstannyń erler ulttyq obrazy tabylmady. Men zalda otyryp, oılandym: jaı ǵana qarap otyra almaımyn. Men model de, qatysýshy da emespin, jaı qonaq edim. Biraq bul — meniń elim, meniń mádenıetim, meniń maqtanyshym. Sonda men shapan kıip shyqtym — haıp úshin emes, sahna úshin emes, erler obrazdary da bizdiń biregeıligimizdiń bir bóligi ekenin eske salý úshin», — dep túsindirdi ol óz ımprovızasıasyn.
Buǵan deıin Kursiv LifeStyle qazaqstandyq dızaınermen suhbat jarıalaǵan bolatyn. Ol óz jumystarynda ólim men qorqynysh estetıkasynan shabyt alady.