Áleýmettik jelilerde merzimdi áskerı qyzmettegi eki matrostyń taǵdyry týraly qaýeset taraǵan soń, Qazaqstan Qorǵanys mınıstrligi olardyń beınesin jarıalady, dep habarlaıdy infohub.kz saıty.
Sóz merzimdi áskerı qyzmettegi matrostar Ahmetov A.A. men Maǵaýıa Á.A. týraly bolyp otyr. Olarǵa qatysty qaýesetter áýelde Kaspı teńizine 19 áskerı qyzmetshiniń sýǵa ketkeni habarlanǵan soń, keıin olardyń sany 17 bolǵany belgili bolǵannan keıin taraı bastady.
Qorǵanys mınıstrligi Áskerı-teńiz kúshteriniń oqý-jattyǵýy barysynda jeke quramnyń bir bóligi jaǵajaıda bolyp, oqý mindetterin oryndaǵanyn málimdegen edi.
«Merzimdi áskerı qyzmettegi matrostar Ahmetov A.A. men Maǵaýıa Á.A. jaǵajaıda oqý mindetterin oryndaǵan áskerı qyzmetshiler tobyna jatty. Qazirgi tańda atalǵan áskerı qyzmetshiler áskerı bólim ornalasqan jerde bolyp, kún tártibine sáıkes qyzmet atqarýda», — dedi vedomstvoda.
Aıtqandaryn rastaý úshin Qorǵanys mınıstrligi eki áskerı qyzmetshiniń beınesin kórsetti.
Eske salaıyq, 24 qyrkúıekte oqý-jaýyngerlik mindetti oryndaý barysynda aýa raıynyń kenetten kúrt nasharlaýy men ekpindi jeldiń saldarynan Kaspı teńizine 17 áskerı qyzmetshi sýǵa ketti, olardyń 14-i qaza tapty. Úsheýi qutqaryldy.
Qaıǵyly oqıǵadan keıin Daýren Kosanov qorǵanys mınıstri qyzmetinen bosatyldy. Onyń ornyna Aıdos Myrzahmetov taǵaıyndaldy.