Jalǵyz ıesi Seıitjan Esimov bolyp tabylatyn «Qostanaı joldary» qurylys kompanıasy 2025 jyldyń qorytyndysy boıynsha 2,4 mlrd teńge taza paıda tapty. Bir jyl buryn bul kórsetkish 909 mln teńge edi, ıaǵnı bir jylda 2,6 ese ósti. Bul týraly kompanıanyń qarjylyq eseptiliginde jazylǵan, dep habarlaıdy infohub.kz saıty.
Qostanaıda tirkelgen «Qostanaı joldary» kompanıasy tolyǵymen Almatyda turatyn 68 jastaǵy Seıitjan Esimovke tıesili. Ol — Qazaqstannyń tuńǵysh prezıdenti Nursultan Nazarbaevtyń jıeni, 75 jastaǵy Ahmetjan Esimovtiń inisi. Ahmetjan Esimov uzaq jylǵy mansabynda Qazaqstannyń Belgıadaǵy, Nıderlandydaǵy jáne Lúksembýrgtegi elshisi, aýyl sharýashylyǵy mınıstri, vıse-premer, Almaty ákimi boldy, «Astana Ekspo-2017» ulttyq kompanıasyn, «Samuryq-Qazynany» basqaryp, ózge de laýazymdarda qyzmet atqardy.
2025 jyly «Qostanaı joldarynyń» túsimi 14,7 mlrd teńgege jetti, al 2024 jyly ol 9,6 mlrd teńge bolyp, 1,5 ese artqan. Kompanıanyń qarjylyq kirisi 26,4 mln teńgeden 118,6 mln teńgege ósip, 4,5 ese kóbeıdi. 2025 jyldyń sońynda bólinbegen paıda 6,6 mlrd teńgeni qurady.
Kompanıa túsken paıdadan dıvıdendterdi turaqty túrde tólep otyrady. 2025 jyly olardyń mólsheri 410 mln teńge, 2024 jyly – 205 mln teńge boldy.
«Qaraǵandy joldarynyń» negizgi qyzmet túrleri – joldar, áýejaılar men sport qurylystaryn salý, sondaı-aq basqa da jumystar. Kompanıanyń birneshe fılıaly bar, onyń ishinde Qaraǵandydaǵy jóndeý-qurylys basqarmasy, Qaraǵandy oblysyndaǵy Botaqara kentindegi jol-paıdalaný ýchaskesi, Qaraǵandy oblysyndaǵy Osakarovka kentindegi jol-paıdalaný ýchaskesi jáne Aqmola oblysyndaǵy Derjavınsk qalasyndaǵy fılıal.
Ashyq derekterge sáıkes, bıyl kompanıa «Qondybaı» ótkizý pýnktine aparatyn Denısovka – Jitiqara – Múktikól – Reseı Federasıasynyń shekarasy baǵytyndaǵy joldyń 42 km ýchaskesin jóndeýge qatysqan.