Germanıada ózenderdiń tartylýyna baılanysty burynǵy qurǵaq jyldardyń kúnderi qashalǵan «ashtyq tastary» ashyldy, dep habarlaıdy infohub.kz saıty.
Bul tastar ǵasyrlar boıy eginniń shyqpaýynyń belgisi sanalǵan: olarǵa sý deńgeıi erekshe tómen bolǵan jyldardy belgilep otyrǵan. Olar Elba ózeniniń Pırna qalasy mańynda paıda boldy. Oberpost aýdanyndaǵy osyndaı tastardyń birinde 20-dan astam kún qashalǵan, olardyń eń ertesi 1707 jylǵa jatady.
Elbadaǵy sý deńgeıi uzaq ýaqyt boıy bir metrden aspaı tur, al Drezdende 54 santımetrge deıin tómendedi. Aımaqtaǵy basqa ózender — Mýlde, Vaıse-Elster, Shpree jáne Neıse de aıtarlyqtaı tartyldy.
Aımaqta sırek naızaǵaımen +34 gradýsqa deıin ystyq aýa raıy saqtalýda, al 10-11 tamyzda +25 gradýsqa deıin qurǵaq jáne shýaqty aýa raıy kútilýde.
Buǵan deıin Serbıa prezıdenti Aleksandr Výchıch Dýnaı ózeniniń tartylýyna baılanysty jaqyn kúnderi keme júzýge jaramsyz bolatynyn málimdegen edi. Vengrıada Dýnaıdyń tartylýy «Paksh» AES-niń energobloktarynyń óshirilýine ákeldi. Sonymen qatar, sý deńgeıiniń tómendeýinen Ekinshi dúnıejúzilik soǵys kezinde batqan kemeler ashyldy.
Eýropadaǵy uzaqqa sozylǵan ystyq aýa raıy tek iri orman órtterine ǵana emes, sonymen qatar buryn-sońdy bolmaǵan qurǵaqshylyqqa ákeldi. Ulybrıtanıada fermerler azyq-túlik tapshylyǵy múmkin ekenin eskertýde, al Eýropanyń basty ózen arterıalarynyń biri — Reın boıyndaǵy keme júzý de qaýip tónip tur.