Qazaqstan premer-mınıstri Oljas Bektenov úkimet otyrysynda jylý maýsymy belgilengen merzimde bastalýy tıis ekenin aıtyp, birqatar tapsyrma berdi, dep habarlaıdy infohub.kz saıty.
«Energıa kásiporyndarynyń jylý maýsymyna daıyndyǵy boıynsha pasporttar alý jumystary bastaldy. Ákimderge energıa nysandarynyń qysqa daıyndyǵyn baǵalaý jónindegi komısıalardyń jumysyna jeke qatysýdy tapsyramyn. (…) Eger jylý maýsymyna daıyndyq pasportynsyz kirse, tıisti basshylar jaýapkershilikke tartylady», — dedi Oljas Bektenov.
«Samuryq-Energo» kompanıasyna premer jóndeý jumystaryn ýaqytyly aıaqtap qana qoımaı, jańa qýattardy paıdalanýǵa berýdi de tapsyrdy. KEGOC kompanıasyna — jeliler men qosalqy stansıalardy jóndeý kestesin saqtaýdy.
Energetıka mınıstrligi men ákimdikterge premer 1 qyrkúıekke deıin óńirlerge áleýmettik mazýt jetkizý kestesin bekitýdi tapsyrdy. QTJ-men birlesip, bekitilgen keste men kólemderge sáıkes energıa nysandaryna kómir men mazýtty ýaqtyly jetkizý sharalaryn qabyldaý qajet.
«Halyqty jáne komýnaldyq-turmystyq sektordy kómirmen ýaqtyly qamtamasyz etý máselesin erekshe atap ótemin. Kómirdi óndirý men tıeýden bastap, halyqqa satýǵa deıingi búkil tizbekti qatań baqylaý qajet. Óńirlerde úzilisterge, baǵanyń negizsiz ósýine jáne jasandy ajıotajǵa jol bermeý kerek», — dedi Bektenov.
Artta qalǵan ákimderge premer bar problemalardy jedel joıýdy tapsyrdy.
«Ónerkásip jáne qurylys mınıstrligine, óńirlerdiń ákimdikterine 1 qyrkúıekke deıin bilim berý jáne densaýlyq saqtaý nysandarynyń tolyq daıyndyǵyn qamtamasyz etýdi tapsyramyn. Aǵartý, ǵylym jáne densaýlyq saqtaý mınıstrlikteri de bul máseleni baqylaýǵa alsyn.
Soltústik, ortalyq jáne shyǵys óńirler boıynsha barlyq ınjenerlik ınfraqurylym men turǵyn úı-kommýnaldyq sharýashylyq nysandary 15 qyrkúıekke deıin, al qalǵan óńirlerde 15 qazanǵa deıin jylý berýge tolyq daıyn bolýy tıis», — dedi Bektenov.
Sonymen qatar, premer-mınıstr jylý maýsymy qarsańynda energıa nysandaryn jóndeýdiń buzylýyna jol bergen basshylardy jazalaýdy tapsyrdy.