Red Metal Group Ltd kompanıasy Qaraǵandy oblysynyń Shet aýdanyndaǵy Aqsoran qorǵasyn ken ornyn ıgerýdi bastamaq. Kendi ashyq ádispen óndirý josparlanyp otyr: barlaý jumystary 2027 jyly bastalyp, naqty óndirý 2028 jyly qolǵa alynady. Qorlar 229,7 myń tonna qorǵasynǵa baǵalanyp otyr, dep habarlaıdy infohub.kz saıty.
Óndirý bastalǵanǵa deıin kompanıa ken ornynyń qurylysyn, ken deneleriniń ornalasýyn, sondaı-aq ınjenerlik-geologıalyq jáne gıdrogeologıalyq jaǵdaılaryn naqtylaý úshin qosymsha geologıalyq barlaý júrgizedi. 118 barlaý uńǵymasyn burǵylaý josparlanyp otyr. Bolashaqta paıdalanylmaıtyn uńǵymalar jumys aıaqtalǵan soń tampondaý arqyly joıylady. Taý-ken jumystarynyń josparyna sáıkes, geologıalyq barlaý shamamen eki jylǵa sozylady.
Aqsorandy eki karermen — Soltústik jáne Ońtústik — ıgerý kózdelip otyr. Taý-ken jumystarynyń jobalyq tereńdigi 350 metrge deıin jetedi. Kásiporynnyń ónimdiligi birtindep jylyna shamamen 450 myń tonnadan 1,65 mln tonna kenge deıin artady. Ken ornyn paıdalaný merzimi 18 jylǵa baǵalanyp otyr. Óndirilgen ken qazirdiń ózinde jumys istep turǵan fabrıkaǵa, múmkin «Nova Sınk» kásipornyna jóneltiledi.
Taý-ken jumystarynyń josparyna sáıkes, Aqsoran ken orny 1931 jyly ashylǵan. Ony barlaý 1940–1950 jyldary júrgizilgen. 1953 jyly C1 jáne C2 sanattary boıynsha qorlar 26,3 mln tonna ken jáne 301,3 myń tonna qorǵasynǵa baǵalanǵan.
Qorǵasyn men myrysh boıynsha mıneraldanýdyń zamanaýı baǵasynda mynadaı kórsetkishter keltiriledi. Qorǵasynnyń jalpy resýrstary ortasha mólsheri 1,12% bolatyn 20,45 mln tonna mıneraldanǵan massaǵa baǵalanyp otyr. Bul shamamen 229,7 myń tonna qorǵasyn. Myrysh boıynsha mıneraldanǵan massa 5,95 mln tonnaǵa baǵalanyp, onda ortasha mólsheri 0,75% bolǵanda shamamen 44,7 myń tonna myrysh bar.
Sonymen qatar ashyq ıgerý úshin neǵurlym tómen kórsetkishter bólingen. Qorǵasyn resýrstary ortasha mólsheri 1,26% bolatyn 12,7 mln tonna kende shamamen 159,7 myń tonnany quraıdy.
Red Metal Group Ltd kompanıasy HQO-da tirkelgen. Onyń ıeleri — Vostok Minerals (Qazaqstanda mundaı kompanıa tirkelmegen, biraq Reseıde osylaı atalatyn zańdy tulǵa bar) jáne ıeleri Aleksandr Kım men Álibek Shakırımov bolyp tabylatyn Minerals Operating.
Buǵan deıin Fonet Er-Tai AK Mining kompanıasy, onyń qos ıesiniń biri «Qazfosfattyń» burynǵy basshysy Maqsutbek Esenov, Pavlodar oblysyndaǵy Aıaq-Qojan mys ken ornynda jańa karer salýdy josparlap otyrǵany habarlanǵan bolatyn.