Almaty oblysyndaǵy taý joryǵy kezinde zardap shekken Reseıdiń eki azamaty 3510 metr bıiktikten evakýasıalandy. Aýa raıynyń qolaısyzdyǵyna baılanysty qutqarýshylar aldymen jaıaý jetýge májbúr boldy, sodan keıin avıasıany paıdalandy, dep habarlaıdy infohub.kz saıty.
Tótenshe jaǵdaılar mınıstrliginiń málimetinshe, oqıǵa 5 tamyzda Talǵar aýdanynda bolǵan. Segiz adamnan turatyn týrısik top 3510 metr bıiktikte ornalasqan «Qazselden qorǵaý» MM «Toǵyzaq» bıik taýly gıdropostyna kómek surap júgingen. Joryqqa qatysýshylardyń ekeýine medısınalyq kómek qajet boldy.
25 jastaǵy áıel týrıs tas tıý saldarynan bas jaraqatyn alǵan. Qyzdy qorǵanys dýlyǵasy aman alyp qalǵan. 32 jastaǵy er adam qulap, qolyn jaraqattaǵan.
Qoıý tuman, uzaqqa sozylǵan jaýyn-shashyn, kúrdeli taýly jer bederi jáne ushý bıiktigine qatysty shekteýlerge baılanysty oqıǵa ornyna tikushaqty jedel jiberý múmkin bolmady. «Sondyqtan TJM „Barys“ respýblıkalyq jedel-qutqarý jasaǵynyń qutqarýshylary zardap shekkenderge Levyı Talǵar shatqalymen jaıaý jetken», — dep habarlady vedomstvodan.
Tańerteń qutqarýshylar gıdropostqa jetip, zardap shekkenderdi tekserip, aýa raıynyń jaqsarýyn kútti. Aýa raıy avıasıany kóterýge múmkindik bergennen keıin týrıser «Qazavıaqutqarý» tikushaǵymen «Medeý» alańyna evakýasıalandy. Ol jerde olardy TJM Apattar medısınasy ortalyǵynyń brıgadasy kútip turdy.
Zardap shekkender odan ári tekserý jáne qajetti kómek kórsetý úshin medısınalyq mekemege jetkizildi. TJM qutqarýshylar men tikushaq ekıpajynyń úılesimdi jumysynyń arqasynda operasıa sátti aıaqtalǵanyn atap ótti. Qazirgi ýaqytta sheteldik týrıserdiń ómiri men densaýlyǵyna eshqandaı qaýip tónip turǵan joq.