Shosе velosportynan Azıa oıyndarynyń tarıhı altyn medalin jeńip alǵan Rınata Sultanova týǵan jerine oraldy: búgin Astana áýejaıynda Azıada-2026 chempıonyn qarsy aldy, dep habarlaıdy infohub.kz saıty.
Sportshyny Qazaqstan Respýblıkasy Týrızm jáne sport mınıstrliginiń ókilderi, sondaı-aq dostary, týǵan-týystary men jankúıerleri quttyqtady.
«Jeńiske jetýime kúndelikti jattyǵýlar men ózimmen jumys isteý kómektesti. Árıne, Azıadada birden eki medal jeńip alǵanyma qýanyshtymyn. Eń aldymen, shosе velosportynda jeńiske jetýdi maqsat etip qoıdym jáne oǵan qol jetkizdim. Meni qoldaǵan barlyq adamdarǵa zor rahmet! Shynymdy aıtsam, búgin áýejaıda sonsha jankúıer bolady dep, Pavlodardan dostarymnyń arnaıy keledi dep kútpeppin. Óte qýanyshtymyn», — dedi Sultanova.
Buǵan deıin «Kýrsıv» jazǵandaı, qazaqstandyq veloshabandoz Rınata Sultanova trektegi omnıýmda Azıa oıyndary-2026-nyń kúmis júldegeri atandy. Tórt dısıplına qorytyndysy boıynsha ol 133 upaı jınap, tek japondyq Iýmı Kadzıharaǵa ǵana jol berdi.
Sultanova úshin bul Azıada-2026-nyń ekinshi medali. 20 qyrkúıekte qazaqstandyq sportshy shosеde jeke ýaqytqa júgirý jarysynda jeńiske jetip, quramaǵa aǵymdaǵy Oıyndardyń alǵashqy altynyn ákeldi.
Eske salaıyq, Japonıada XX jazǵy Azıa oıyndary aıaqtaldy. Qazaqstan quramasy 84 medal — 12 altyn, 24 kúmis jáne 48 qola — jeńip alyp, 46 qatysýshy eldiń ishinde jalpykomandalyq esepte segizinshi orynǵa turaqtady.
2023 jyly Hanchjoýda ótken Oıyndarda Qazaqstan 11-oryn alǵan bolatyn. Osylaısha, ótken Azıadamen salystyrǵanda komanda úsh satyǵa kóterilip, altyn medal sanyn arttyrdy. Sonymen qatar, Qazaqstan quramasy aǵymdaǵy Oıyndarda olımpıadalyq dısıplınalarda birqatar tarıhı nátıjelerge qol jetkizdi.