Nıderland zertteýshileri mı tinderi arqyly ózdiginen jol tabatyn burama pishindi shaǵyn robot jasap shyǵardy. Bul tehnologıa mıdyń tereń bólikterine dári jetkizýde tóńkeris jasaýy múmkin, dep habarlaıdy infohub.kz.
Tvente ýnıversıteti men Radbaýd medısınalyq ortalyǵynyń mamandary syrtqy magnıtpen basqarylatyn qurylǵy jasady. Magnıt órisiniń aınalýy robotty alǵa jyljytyp, aınalasyndaǵy tindi «burap» ótedi. Bul tásil pasıenttiń bas súıegin ashpaı-aq mıdyń tereńindegi aımaqtarǵa jetýge múmkindik beredi.
Tehnologıanyń basty ereksheligi — qan aǵymy men tinder arqyly zaqymdanǵan jerge enip, kúrdeli medısınalyq operasıalardy aıtarlyqtaı jeńildetedi. Qozǵalys kezinde robot syrtqy magnıtpen sınhrondy aınalady, alaıda aınalý jyldamdyǵy tym joǵary bolsa, ol basqarýdan shyǵyp, retsiz qozǵala bastaıdy. Bul shek tinniń qattylyǵyna baılanysty: jumsaq ortada robot sekýndyna 30 aınalymǵa deıin jetse, qattyraq ortada bul kórsetkish bir aınalymnan tómen túsedi.
Eksperımentter barysynda robot mıdyń jumsaq geldik úlgisinde jáne naqty qoı mıynyń tininde synaldy. Qan aǵymy bolmaǵan kezde ol magnıtpen sekýndyna shamamen 1,8 aınalymǵa deıin sınhrondy saqtasa, qan aınalymy ımıtasıalanǵanda qaýipsiz shek sekýndyna 0,45 aınalymǵa deıin tómendedi. Mı tini arqyly robot sekýndyna shamamen 0,2 mm jyldamdyqpen qozǵalsa, keri baǵytta — sekýndyna 2,9 mm-ge deıin jetti, sebebi jańa arna jasaýdyń qajeti joq.
Berilgen núktege jetý dáldigi bir mıllımetrden az boldy, bul zertteýshilerdiń pikirinshe, mıdyń tereń bólikterindegi isikterge dálirek áser etý múmkindigin ashady. Ázirge tehnologıa tek zerthanalyq jaǵdaıda synalǵan, biraq ol odan ári zertteýlerde tıimdiligin kórsetse, bas súıegin ashpaı-aq mıǵa kúrdeli operasıalar jasaýǵa qoldanyla alady.
Buǵan deıin Shvesıadaǵy Geteborg ýnıversıtetiniń ǵalymdary naǵyz juldyzqurt sıaqty qozǵalatyn erekshe jumsaq robotty usynǵany habarlanǵan bolatyn. Bolashaqta mundaı apparat káriz qubyrlaryn tekserýge jáne tipti Marsty zertteýge qoldanylýy múmkin.