Hugging Face jáne Pollen Robotics kompanıalary Microduck atty robot-úırekti tanystyryp, aldyn ala tapsyrystardy qabyldaı bastady. Syrtqy túri kóńildi oıynshyq bolǵanymen, ishinde jasandy ıntellektpen tájirıbe jasaýǵa arnalǵan tolyqqandy platforma jasyrylǵan, dep habarlaıdy infohub.kz.
Microduck-tiń basty maqsaty — ıesin kóńildi ýaqyt ótkizý ǵana emes, jasandy ıntellektini naqty álemmen árekettesýge úıretý múmkindigin berý. Úırekpen onyń qozǵalysyn, baǵdarlaýyn, kedergilerden ótýin tájirıbeden ótkizip, jańa áreketterge úıretýge bolady.
Ashyq bastapqy kodtyń arqasynda ázirleýshiler baǵdarlamalyq jasaqtama men oqytý modelderin óz betinshe ózgerte alady. Satyp alýshy jaı ǵana oıynshyq emes, jasandy ıntellektpen tájirıbe jasaýǵa arnalǵan shaǵyn fızıkalyq «polıgon» alady.
Microduck-tiń bıiktigi nebári 25 sm, salmaǵy 800 gramnan az. İshinde 15 motor bar, sonyń arqasynda ol júre alady, otyra alady, qulaǵannan keıin ózdiginen tura alady, tipti kishkentaı rolıktermen syrǵanaı alady.
Degenmen, qoraptan shyqqan kezde oıynshyq tek lazerlik kórsetkishke erýge jáne púltten basqarýǵa jaýap berýge ǵana qabiletti. Qalǵanynyń bárin ázirleýshiler qolmen baptap, neırojelini ózdiginen oqytýy kerek.
Sonymen qatar, Microduck-te kamera, keńistikte baǵdarlaýǵa kómektesetin LiDAR-sensor jáne eki qozǵalys dachıgi bar. Taǵy bir qozǵalmaly tumsyǵy bar — onymen robot usaq zattardy kótere alady. Sóıleýdiń ornyna ol kiriktirilgen mıkrofon men dınamık arqyly dybys shyǵarady, ár robotqa óz «daýysyn» baptaýǵa bolady.
Microduck bir zarádta shamamen bir saǵat jumys isteıdi. Derekterdi saqtaý úshin 32 GB jady qarastyrylǵan, sonymen qatar Wi-Fi jáne Bluetooth bar. Aldyn ala tapsyrystar qazirdiń ózinde ashyq, robottyń baǵasy — $399 (shamamen 185 myń teńge), tórt tústiń birin tańdaýǵa bolady: kremdi, grafıt, sıren jáne aspan kógildir.
Buǵan deıin Kursiv LifeStyle qytaılyq gýmanoıd robot «Naızaǵaı» 100 metrdi 9,32 sekýndta júgirip ótip, Ýseın Bolttyń kópjyldyq álemdik rekordyn jańartqanyn jazǵan bolatyn. Tarıhı júgiris Beıjińdegi Robottardyń álemdik oıyndarynda ótti.