Elena Rybakınanyń 2026 jylǵy AQSh ashyq chempıonatyndaǵy jeńisi oǵan rekordtyq júlde ákeldi. Alaıda tapqan somanyń edáýir bóligi AQSH-taǵy salyqqa ketýi múmkin. Áıelder arasyndaǵy jekeleı synda jeńiske jetken qazaqstandyq tenısshi 5,5 mln dollar tapty — bul byltyrǵy Arına Sobolenko alǵan 5 mln dollardan kóp, dep habarlaıdy infohub.kz saıty.
US Open-2026 týrnıriniń jalpy júlde qory 108 mln dollardy qurady — Úlken dýlyǵa týrnırleri tarıhynda alǵash ret 100 mln dollardan asty.
sports.yahoo.com saıtynyń jazýynsha, rekordtyq tólem sportshynyń qolynda tolyq qalady degendi bildirmeıdi: onyń edáýir bóligin AQSH-taǵy salyq retinde berýge týra keledi.
«US Open Nú-Iorkte ótetindikten, sportshynyń tabysyna AQSH-tyń federaldyq salyǵy men Nú-Iork shtatynyń salyǵy qoldanylady. Keltirilgen esepte joǵary tabystar úshin eń joǵary federaldyq mólsherleme 37% jáne Nú-Iork shtatynyń mólsherlemesi shamamen 9,65% paıdalanylǵan. Osy baǵalaý boıynsha federaldyq salyq shamamen 2,03 mln dollardy, al shtat salyǵy 530 myń dollardan astamdy quraıdy. Jalpy alǵanda salyq tólemderi shamamen 2,5 mln dollardy quraýy múmkin. Qazaqstan da tabystarǵa salyq salýdy kózdeıdi, alaıda AQSH-ta tólengen salyqtar Qazaqstandaǵy mindettemelerdi esepteý kezinde eskerilýi múmkin, bul qoldanystaǵy erejeler sheginde qosarlanǵan salyq salýdan aýlaq bolýǵa múmkindik beredi», — delingen habarlamada.
Osylaısha, rekordtyq 5,5 mln dollardan eseptelgen salyqtardy tólegennen keıin Rybakınanyń qolynda shamamen 2,9 mln dollar qalýy múmkin.
Sonymen qatar túpkilikti soma sportshynyń salyqtyq mártebesine jáne sońǵy esepte eskerilýi múmkin kásibı shyǵystarǵa baılanysty ózgerýi yqtımal.
Buǵan deıin Qazaqstannyń birinshi raketkasy Elena Rybakınanyń 2026 jylǵy AQSh ashyq chempıonatyndaǵy óneri úshin qansha tapqany belgili bolǵanyn habarlaǵan bolatynbyz.