Fransıanyń Issýar qalasyndaǵy Zamanaýı óner ortalyǵynan Salvador Dalı jasaǵan «Áýlıe Ioann Apokalıpsısiniń» qola muqabasy urlandy. Muqabanyń salmaǵy shamamen 150 kg, pergament betterimen qosqanda kitaptyń jalpy salmaǵy 210 kg-ǵa jetedi. Urlyq faktisin Klermon-Ferran prokýratýrasy rastady, dep habarlaıdy infohub.kz saıty.
Týyndy 4 qazannan 5 qazanǵa qaraǵan túni joǵalyp ketken. Qola muqaba altynmen, asyl tastarmen jáne teńiz qabyrshaqtarymen bezendirilgen.
Kitap 1958–1961 jyldary fransýz baspageri Jozef Foreniń bastamasymen jasalǵan. Ol álemde jalǵyz dana bolyp sanalady. Týyndy ústinde jeti sýretshi men jeti jazýshy jumys istegen, olardyń qatarynda Salvador Dalı, Leonar Fýjıta, Bernar Búffe, Jan Kokto jáne Emıl Choran bar.
Mátin 150 pergament betine qolmen jazylǵan. Buryn bul basylym álemdegi eń aýyr jáne eń qymbat kitap sanalǵan.
Halyqaralyq kórmelerden keıin týyndy Shveısarıada saqtalǵan, keıin japon ıelerine ótken. Keıinirek ony kolleksıoner ári restavrator Krıstıan Karýsos satyp alǵan. Muqaba men pergament betteriniń bir bóligi onyń Issýardaǵy óner ortalyǵynda qoıylǵan.
Prokýratýra urlanǵan týyndyny «erekshe jáne biregeı» dep atady. Tergeý jandarmerıaǵa tapsyryldy. Urlyqtyń mán-jaıy ázirge jarıalanbaı otyr.