Самара — Шымкент республикалық маңыздағы тас жолында Қазақстан арқылы транзитпен өткен жолаушылар автобусы мәжбүрлі түрде тоқтады: полицейлер мен құтқарушылар 15 ересек адам мен баланы мешітке жеткізді, деп хабарлайды infohub.kz сайты.
ҚР ІІМ-нің Telegram-арнасындағы мәліметінше, бүгін сағат 01:11 шамасында Самара — Шымкент республикалық маңыздағы автожолының 1214-шақырымында, Қызылорда облысының шекарасына жақын жерде патрульдік полиция наряды жол жиегінде тоқтап тұрған автобусты байқаған.
Тексеру барысында Van Hool автобусы Тәжікстаннан Ресейге қарай келе жатқаны, алайда жолда техникалық ақау салдарынан тоқтағаны анықталды. Салонда екі жүргізуші мен 15 жолаушы болған, олардың барлығы — Тәжікстан азаматтары. Жолаушылар арасында алты әйел, төрт бала және бес ер адам бар.
Патрульдік полиция ротасының қызметкерлері Ырғыз ауданының құтқарушыларымен бірлесіп, жолаушыларды эвакуациялауды дереу ұйымдастырды. 15 адамның барлығы қауіпсіз жерге жеткізіліп, Ақтөбе облысындағы Ырғыз поселкесінің қиылысында, Самара — Шымкент автожолының 1153-шақырымында орналасқан мешітке орналастырылды.
Эвакуацияланғандар медициналық көмекке мұқтаж емес. Олардың өмірі мен денсаулығына ешқандай қауіп төніп тұрған жоқ.