Búgin keshke Samarqandta 46-dúnıejúzilik shahmat olımpıadasy saltanatty túrde ashylady. Oǵan 398 komanda, 1974 shahmatshy jáne 240 grosmeıster qatysady, dep habarlaıdy infohub.kz saıty.
Týrnırge Qazaqstan quramalary da qatysady. Áıelder komandasy 2024 jyly Býdapeshtte ótken ótken Olımpıadanyń vıse-chempıony retinde jarysty bastaıdy.
Áıelder týrnıriniń favorıtteri – Ózbekstanǵa negizgi quramymen kelgen Úndistannyń qazirgi chempıondary. Basty básekelester starttyq nómirleri boıynsha: Grýzıa, Qytaı, Qazaqstan jáne AQSh. Reseıdiń áıelder jáne erler quramalary Samarqandtaǵy týrnırge jiberilmedi.
Bizdiń komanda úshin birinshi taqtada tamasha maýsym ótkizip jatqan 22 jastaǵy grosmeıster Bıbısara Asaýbaeva oınaıdy. Otandyq áıelder shahmatynyń kóshbasshysy Norway Chess bedeldi týrnırinde jeńiske jetip, Cairns Cup-ta úshinshi oryn aldy. Sondaı-aq álemdik shahmat táji úshin pretendentter týrnırinde ekinshi orynǵa turaqtady.
208 komandanyń ishinen 34-shi septi alǵan Qazaqstannyń erler quramasynyń birinshi nómiri – 26 jastaǵy grosmeıster Denıs Mahnev.
Ashyq (erler) týrnırinde birinshi starttyq nómirdi AQSh quramasy ıelendi. Ekinshi – qazirgi shahmat koroli Gýkesh Dommaradjý bastaǵan 2024 jylǵy chempıon úndisterde, úshinshi – Javohır Sındarov bastaǵan Ózbekstanda. Ol – shahmat tájine úmitker ári bizdiń Asaýbaevanyń jigiti. Aıtpaqshy, Dommaradjý – Sındarov arasyndaǵy álem chempıony ataǵy úshin mach Jenevada 22 qarasha men 13 jeltoqsan aralyǵynda ótedi.
Dúnıejúzilik shahmat olımpıadasy shveısar júıesimen 11 týrda ótedi. Ár komanda quramynda 4 oıynshy jáne 1 qosalqy bar. Ýaqyt baqylaýy klasıkalyq: alǵashqy 40 júriske 90 mınýt qosyp, 30 mınýt. Ár júristen keıin, birinshiden bastap, 30 sekýnd qosylady.
Machta jeńiske jetken qurama eki komandalyq upaı alady, teń oıyn úshin – bir upaı. Teńdik bolǵan jaǵdaıda qosymsha kórsetkishter júıesi qoldanylady: Berger koefısıenti (qarsylastar jınaǵan upaı sany), sondaı-aq komanda músheleriniń jeke upaılarynyń qosyndysy.
Erler týrnıriniń jeńimpazdaryna lord Frederık Gýstavýs Gamılton-Rassel kýbogy, áıelder týrnıriniń jeńimpazdaryna Vera Menchık kýbogy tabys etiledi. Eki komandanyń da ornynyń eń az qosyndysy boıynsha úzdik shyqqan el Nona Gaprındashvılı kýbogymen marapattalady.
2026 jylǵy Dúnıejúzilik shahmat olımpıadasy kezinde FIDE kongresi ótedi, onyń bas assambleıasynda 26 qyrkúıekte Halyqaralyq shahmat federasıasynyń jańa prezıdenti saılanady. Úmitkerler úsheý: nemis Ian-Henrık Búttner, reseılik Vadım Rozenshteın jáne Qazaqstannan Tımýr Týrlov.