Qazaqstan Prezıdenti Qasym-Jomart Toqaev «Samuryq-Qazyna» AQ basqarma tóraǵasy Nurlan Jaqypovty qabyldady, dep habarlaıdy infohub.kz.
Kezdesý barysynda memleket basshysy «Samuryq-Qazyna» qorynyń qyzmeti, negizgi óndiristik jáne qarjylyq kórsetkishterdiń oryndalýy, sondaı-aq iri ınfraqurylymdyq jobalardyń iske asyrylýy týraly esepti tyńdady.
Qor basqarma tóraǵasy Nurlan Jaqypov 2026 jyly «Samuryq-Qazyna» 3,2 trln teńgege ınvestısıalyq jobalardy aıaqtaýdy josparlap otyrǵanyn málimdedi. Olardyń qatarynda — Moıynty — Qyzyljar jáne Darbaza — Maqtaaral temirjol jelileriniń qurylysy, Altynkól — Jetigen jáne Beıneý — Mańǵystaý ýchaskelerin jańǵyrtý, Qashaǵan ken ornynda gaz óńdeý zaýytyn salý, Almaty JEO-2 jańǵyrtý, Túrkistan oblysynda bý-gaz qondyrǵysyn jáne gıbrıdti elektr stansıasyn salý. Sonymen qatar, Astanada derekterdi óńdeý ortalyǵynyń qurylysy jáne Kaspı teńiziniń túbimen talshyqty-optıkalyq baılanys jelisin tartý aıaqtalýda.
Nurlan Jaqypov qordyń ınvestısıalyq portfeli týraly da aqparat usyndy. «Bul baǵytta 2027–2029 jyldary energetıka, munaı-gaz salasy, kólik jáne sıfrlyq ınfraqurylym salalarynda 21 trln teńgege 38 jobany iske asyrý josparlanýda. Áleýmettik baǵyttyń basymdyqtary retinde medısınalyq jáne áleýmettik nysandardy salý, múgedektigi bar balalarǵa arnalǵan 55 ortalyq pen 46 ınklúzıa kabınetin ashý, sondaı-aq sporttyq jáne bilim berý ınfraqurylymyn damytý qarastyrylýda», — dep naqtylady qor tóraǵasy.
Kezdesý qorytyndysy boıynsha prezıdent qor jumysynyń negizgi baǵyttary boıynsha birqatar tapsyrmalar qoıdy.