13 tamyzdan bastap Qazaqstan kınoteatrlarynda Disney kompanıasynyń anımasıalyq fılminiń jelisi boıynsha túsirilgen «Moana» fılmi kórsetile bastady. Kursiv LifeStyle anyqtaǵandaı, orys tilindegi nusqada basty keıipkerdiń vokaldyq partıalaryn 21 jastaǵy qazaqstandyq ánshi Sanat Asýat oryndaǵan, dep habarlaıdy infohub.kz.
Sanat úshin bul jobaǵa qatysý kópten bergi armanynyń oryndalýy boldy. Ol bala kezinen Disney múltfılmderin jaqsy kóretinin jáne bir kúni keıipkerge óz daýysyn syılaýdy armandaǵanyn moıyndady. «Meni osy jobaǵa shaqyryp, erekshe róldi senip tapsyrǵandaryna óte rızamyn. Bul shynymen de úlken mártebe jáne shyǵarmashylyq ómirimdegi mańyzdy kezeń. Bala kezimnen Disney múltfılmderin jaqsy kóretinmin, ári kez kelgen vokalıst sıaqty meniń de bir kúni keıipkerge daýysymdy syılaý armanym boldy», — dedi ánshi.
Ánshiniń aıtýynsha, Moananyń beınesi oǵan erekshe jaqyn, sebebi keıipker óz jolymen júretin batyl ári qaısar. Sanat odan qazaq qyzynyń tarıhı beınesine uqsastyqty kóredi.
Asýat kópshilikke tanymal: ol «Golos Azerbaıdjana — 2025» jobasynyń jeńimpazy atanǵan jáne «Golos» franshızasynyń álemdik reıtıńterinde eń kóp aıtylǵan vokalısterdiń qatarynda bolǵan. 2026 jyly Temirbek Júrgenov atyndaǵy Qazaq ulttyq óner akademıasyn bitirgen, al jaqyn josparlarynda — avtorlyq álbommen jumys.
Buǵan deıin Kursiv LifeStyle «Moana» fılminiń álemdik prokatta kasalyq túsimder boıynsha kútkendi aqtamaǵanyn habarlaǵan bolatyn.