Qazaqstannyń qurylys kompanıalary aldaǵy bes jylda jasandy ıntellekt pen sıfrlyq tehnologıalardy engizbese, básekege tótep bere almaı qalýy múmkin. Bul týraly «Qazaqstan qurylysshylar odaǵy» fılıalynyń Almaty qalasy boıynsha dırektory Tımýr Nurtaev málimdedi, dep habarlaıdy infohub.kz saıty.
Onyń baǵalaýynsha, elimizdegi qurylys salasynyń sıfrlandyrý deńgeıi óte tómen.
«Shynymdy aıtsam, meniń jeke pikirim: Qazaqstandaǵy qurylys salasynyń sıfrlandyrýy óte tómen deńgeıde. Bul baǵytta kósh bastap júrgen birqatar kompanıalar bar, biraq jalpy alǵanda, bul — tipti apatty jaǵdaı», – dedi Nurtaev.
Ol problemalardyń biri retinde jobalaý kezinde BIM-tehnologıalardyń (ǵımarattyń nemese joldyń barlyq ólshemderi, materıaldary men júıeleri týraly derekterdi qamtıtyn sıfrlyq 3D-modelin jasaý prosesi) jetkiliksiz qoldanylýyn atady. Qurylysshylar odaǵy ókiliniń aıtýynsha, kóptegen jobalaý uıymdary mundaı sheshimderdi áli kúnge deıin qoldanbaıdy, sebebi bul zańnamada da, tapsyrys berýshi tarapynan da talap etilmeıdi.
Saldary qurylys kezinde tikeleı baıqalady. Mysaly, ınjenerlik komýnıkasıalar bir-birimen qıylysyp, keıbir jumystardy qaıta isteýge týra keledi. Bul qurylys salýshynyń shyǵynyn arttyryp, sońynda qurylys qunyna áser etedi.
Nurtaev jobalaý kezeńinde sıfrlyq tehnologıalardy belsendirek qoldaný mundaı problemalardy aldyn ala anyqtaýǵa jáne qaıta jumystardyń sanyn azaıtýǵa múmkindik beretinin aıtady.
Sıfrlandyrýdyń taǵy bir baǵyty retinde Nurtaev memlekettik saraptamadan ótýdi atady. Onyń aıtýynsha, qazir jobanyń saraptama merzimi 45 jumys kúnin nemese shamamen 60 kúntizbelik kúndi quraıdy. Biraq joba birinshi retten óte almaýy múmkin, bul merzimdi odan ári uzartady.
Sarapshy mysal retinde memlekettik saraptama salasynda jasandy ıntellektti qoldanatyn Armeta kompanıasyn keltirdi. Onyń aıtýynsha, bul kompanıanyń tehnologıalary prosesti úsh-tórt kúnge, al keıbir jaǵdaılarda birneshe saǵatqa deıin qysqartýǵa múmkindik beredi.
Nurtaevtyń pikirinshe, jobalaý, saraptama jáne qurylys prosesterin sıfrlandyrý nysandardyń qunyn tómendete alady.
Sonymen qatar, Qazaqstannyń qurylys salasy robottandyrý men drondardy qoldanýdy belsendirek qarastyrýy kerek. Maman bul tehnologıalardyń, atap aıtqanda, Qytaıda qoldanylyp jatqanyn atap ótti.
Qurylysshylar odaǵynyń ókili jańa tehnologıalardy engizý bolashaqta shyǵyndardy azaıtýdyń ǵana emes, kompanıalardyń básekege qabilettiliginiń máselesine aınalady dep sanaıdy.
«Aldaǵy bes jylda jasandy ıntellekt pen sıfrlandyrýdy engizbegen kompanıalar naryqta shydamaıdy, óıtkeni olardy qoldanatyn jáne engizetinderdiń qurylys quny tómen bolady», – dedi Nurtaev.