«Sozaq Fosfat» kompanıasy Seıtjanovtar otbasy bıznesiniń quramyna kiredi. Ol Sozaq aýdanynda fosforıt kenin tereń óńdeý zaýytyn salýǵa 150 mlrd teńge ınvestısıalaıdy, dep habarlaıdy infohub.kz saıty Túrkistan oblysy ákimdigine silteme jasap.
Kásiporyndy 2028 jyly iske qosý josparlanǵan. Zaýyt shamamen myń jumys ornyn ashady dep kútilýde. 10 jyl ishinde jobanyń búdjetke salyq tólemderi shamamen 43,3 mlrd teńgeni quraıdy.
Kásiporyn tolyq óndiristik sıkldi qamtamasyz etedi – ken óndirý men baıytýdan bastap joǵary qosylǵan quny bar hımıalyq ónim shyǵarýǵa deıin. Jobalyq qýatqa shyqqannan keıin zaýyt jylyna 2 mln tonna fosfat kenin baıyta alady.
Hımıalyq ónimniń jyldyq óndiris kólemi: kúkirt qyshqyly – 1,6 mln tonna, fosfor qyshqyly – 600 myń tonna, dıammonıfosfat (DAP) – 600 myń tonna, monoammonıfosfat (MAP) – 600 myń tonna, sıntetıkalyq amıak – 350 myń tonna.
Ónimdi ishki naryqqa jetkizý, sondaı-aq Qytaıǵa, Úndistanǵa jáne jaqyn shet elderge eksporttaý josparlanýda.
Joba ındýstrıalandyrý kartasyna engizilgen. Ken ornyndaǵy fosforıt qory shamamen 1 mlrd tonnaǵa baǵalanady, quramyndaǵy fosfor 20-30%.
Jobanyń tehnologıalyq bóligin qytaılyq Sinopec Nanjing Engineering Co., Ltd. kompanıasy ázirleıdi, onymen EPC-kelisimshart jasalǵan. Qazir mamandar alańdy zerttep, ken úlgilerin alyp, tehnologıalyq sheshimderdi tekserýde. Tehnıkalyq-ekonomıkalyq negizdemeni (TEN) ázirleýdi bıylǵy qazan aıynda aıaqtaý josparlanýda, odan keıin jobalaý, ınfraqurylym tartý, temir jol salý jáne jabdyq satyp alý bastalady.
«Saýts-Oıl» holdıńiniń prezıdenti Serikjan Seıtjanovtyń aıtýynsha, jańa kásiporynǵa jumysqa 300 jas mamandy shetelge oqýǵa jiberý josparlanýda.
Serikjan Seıtjanov otbasymen birge Forbes nusqasy boıynsha Qazaqstannyń 75 eń baı bıznesmeni reıtıńinde $402 mln baılyǵymen 27-orynda tur.
Sondaı-aq otbasyna «MunaıQurylysServıs» qurylys kompanıasy, Smart-Oil burǵylaý kásiporny, «Standart Sement», Central Asia Mining Co jáne Talas Investment Company sıanıd zaýyty tıesili. Seıtjanovtar sondaı-aq Rixos Khadisha Shymkent jáne Rixos Turkestan qonaq úılerine, Khanshaiym Plaza saýda-oıyn-saýyq ortalyǵyna ıelik etedi.
Buǵan deıin «Kýrsıv» Almaty oblysynda 9,5 mlrd teńgege jańa zaýyt iske qosylǵanyn jazǵan.