Qazaqstandyq UFC ókili Shavkat Rahmonovtyń jattyqtyrýshysy Edýard Bazrov sportshynyń densaýlyq jaǵdaıyna baılanysty 2026 jyly oktagonǵa orala almaıtynyn málimdedi, dep habarlaıdy infohub.kz.
Bazrovtyń aıtýynsha, Rahmonovtyń jaǵdaıy tolyqqandy daıyndyq júrgizýge múmkindik bermeıdi. Alaıda dárigerler jattyǵýlarǵa qatysýǵa tyıym salmaıdy jáne ońaltý barysyna oń boljam jasaıdy. «Qazir Shavkat aıaǵyn qalpyna keltirip jatyr, kúnine bir ret jattyǵady. Biz dene shynyqtyrý jáne boks boıynsha qazirgi múmkindikterimizdi paıdalanyp jattyǵýlar jasaımyz. Onyń naqty oralý merzimin dál aıta almaımyz. Óıtkeni jaraqattan keıin árkim ártúrli qalpyna keledi. Meniń oıymsha, kelesi jyly. Meniń paıymdaýymsha, 2027 jyldyń aqpanynda ol jekpe-jekke tolyq daıyn bolýy múmkin, biraq Shavkat Rahmonovtyń qashan tolyq saýyǵatynyn dál aıtý áli múmkin emes», – dedi Edýard Bazrov.
Jattyqtyrýshynyń sózinshe, Rahmonov saýyqqannan keıin oǵan birden top qarsylas taǵaıyndalady, óıtkeni jaraqat alǵan kezde qazaqstandyq UFC-diń jartylaı orta salmaq dárejesindegi reıtıńte ekinshi orynda tur edi. Eske salaıyq, mamyr aıynyń sońynda Shavkat Rahmonov uzaq úzilisten keıin jattyǵý prosesine oralǵany belgili boldy. Rahmonovtyń sońǵy jekpe-jegi 2024 jyldyń jeltoqsanynda UFC 310 týrnırinde ótip, onda ırlandıalyq Ien Machado Gerrıdi biraýyzdan sheshimmen jeńip, rekordyn saqtap qaldy — 19–0. Osydan keıin ol densaýlyq problemalaryna baılanysty oktagonǵa uzaq ýaqyt shyqpaı, UFC-diń jartylaı orta salmaq reıtıńiniń aldyńǵy qatarynan shyǵyp qaldy.