Qazaqstannyń Aýyl sharýashylyǵy mınıstrligi BUU-nyń Azyq-túlik jáne aýyl sharýashylyǵy uıymymen (FAO) birlesip, eldiń agroónerkásip keshenin jańǵyrtýǵa baǵyttalǵan úsh strategıalyq jobany iske asyrýǵa kiristi. Bastamalar shegirtkeni baqylaý úshin jasandy ıntellektti engizýdi, topyraq jaǵdaıyn baǵalaý júıesin qurýdy jáne otandyq seleksıany damytýdy, sonyń ishinde áıgili alma sorty – almaty aportyn qaıta jańǵyrtýdy kózdeıdi, dep habarlaıdy infohub.kz.
Jobalardyń resmı tusaýkeseri Astanada ótken kirispe semınar barysynda jasaldy. Bul semınar Aýyl sharýashylyǵy mınıstrligi men FAO arasyndaǵy áriptestik baǵdarlamasy aıasynda uıymdastyrylǵan.
«Áriptestik baǵdarlamasy – on jylǵa eseptelgen, Qazaqstan úkimeti men FAO arasyndaǵy uzaqmerzimdi yntymaqtastyq tetigi. Onyń negizgi maqsaty – aýyl sharýashylyǵynyń turaqty damýyna járdemdesý, azyq-túlik qaýipsizdigin nyǵaıtý, zamanaýı tehnologıalardy engizý jáne ozyq halyqaralyq tájirıbeni paıdalaný», – dep túsindirdi ASHM-da.
İs-shara barysynda Aýyl sharýashylyǵy vıse-mınıstri Ermek Kenjehanuly FAO-nyń Eýropa jáne Ortalyq Azıa jónindegi óńirlik ókiliniń orynbasary Raımýnt Ielemen kezdesti. Taraptar qoldanystaǵy yntymaqtastyq baǵdarlamasynyń iske asyrylýyn, odan ári ózara is-qımyldyń keleshegin, agrarlyq salaǵa zamanaýı tehnologıalardy engizýdi jáne ǵylymı yntymaqtastyqty damytýdy talqylady.
Ermek Kenjehanulynyń aıtýynsha, jańa bastamalar boıynsha negizgi qujattardy daıyndaý aıaqtalý satysyna jetken. «Sarapshylar toptarymyzdyń birlesken kúsh-jigeriniń arqasynda negizgi qujattardy ázirleý aıaqtalý satysyna shyqty. Árbir jobanyń halyqaralyq standarttarǵa jáne eldiń AÓK damytýdyń ulttyq basymdyqtaryna saı kelýi mańyzdy. Jobalardyń iske qosylýy otandyq aýyl sharýashylyǵyn tehnologıalyq jańǵyrtýǵa aıtarlyqtaı serpin beretinine senimdimin», – dedi vıse-mınıstr.
Birinshi joba topyraqtyń organıkalyq kómirtegin monıtorıńteý, baǵalaý jáne rastaýdyń ulttyq júıesin qurýdy kózdeıdi. Bul júıe jer resýrstaryn tıimdi basqarýǵa, topyraq qunarlylyǵyn arttyrýǵa jáne ulttyq kómirtegi naryǵyn damytýǵa ǵylymı negiz bolýy tıis.
Ekinshi baǵyt aýyl sharýashylyǵy zıankesterimen kúresti sıfrlandyrýǵa baılanysty. Shegirtkeniń taralýyn baqylaý jáne boljaý júıesin jasandy ıntellekt pen ushqyshsyz ushý apparattary tehnologıalaryn qoldana otyryp jetildirý josparlanýda. Bul zıankesterdiń taralý oshaqtaryn tezirek anyqtaýǵa, boljam dáldigin arttyrýǵa jáne sheshim qabyldaýdyń jedeldigin kóterýge múmkindik beredi.
Úshinshi joba – «Qazaqstandyq sorttar men tuqymdar» ulttyq bastamasyn iske asyrý. Bul bastama otandyq seleksıa men tuqym sharýashylyǵyn damytýǵa, ósimdikterdiń genetıkalyq resýrstaryn saqtaýǵa jáne qazaqstandyq aýyl sharýashylyǵy daqyldarynyń sorttaryn nasıhattaýǵa baǵyttalǵan.
«Osy bastama aıasynda qazaqstandyq baý-baqsha sharýashylyǵynyń sımvoldarynyń biri sanalatyn aty ańyzǵa aınalǵan alma sorty – almaty aportyn qaıta jańǵyrtýǵa jáne tanymal etýge erekshe kóńil bólinedi», – dep atap ótti vedomstvo.
Eki kún boıy Aýyl sharýashylyǵy mınıstrliginiń, FAO-nyń, BUU júıesi agenttikteriniń, ǵylymı-zertteý ınstıtýttarynyń, salalyq qaýymdastyqtardyń jáne jeke sektordyń ókilderi jobalardyń tehnıkalyq parametrlerin qarap, jyldyq jumys josparlaryn bekitip, vedomstvoaralyq ózara is-qımyl tetikterin aıqyndaıdy. Sondaı-aq semınar qatysýshylary ınovasıalyq tehnologıalardy engizý, klımatqa tózimdi aýyl sharýashylyǵyn damytý, agroónerkásip keshenin sıfrlandyrý, ósimdikterdiń genetıkalyq resýrstaryn saqtaý, tabıǵı resýrstar monıtorıńin jetildirý jáne aýyl sharýashylyǵy táýekelderin basqarý tıimdiligin arttyrý máselelerin talqylaıdy.