InfoHub Logo

Sherzat Polatty óltirgenderge qatysty sot úkimi shyqty

Búgin Taldyqorǵanda 16 jastaǵy Sherzat Polatty óltirý isine qatysty sot úkimi jarıalandy. Bul rezonansty qylmys 2024 jyldyń 4 qazanynda Talǵar qalasynda oryn alǵan bolatyn.

Sot sheshimimen basty aıyptalýshy Abzal Shynasyl 23 jylǵa bas bostandyǵynan aıyryldy. Ol QR Qylmystyq kodeksiniń 99-baby 2-bóligi (adam óltirý), 293-baptyń 3-bóligi (buzaqylyq) jáne 24-baptyń 3-bóligi (qylmys jasaýǵa oqtalý) boıynsha kináli dep tanyldy.

Qalǵan aıyptalýshylarǵa mynadaı jaza taǵaıyndaldy:

Ravıl Sakıev — 20 jyl (buzaqylyq jáne adam óltirýge oqtalý),

Azamat Toqtaýbaev — 15 jyl (buzaqylyq jáne urlyq),

Shyńǵys Belǵojaev, Darhan Áskentaı, Nurqıas İlıasov, Nurbol Toqtaýbaev, Dıdar Qalıahmet — árqaısysy 7 jyl (buzaqylyq),

Dýman Ysqaq — 1 jyl 6 aı (qylmys týraly habarlamaý).

2025 jyldyń 10 sáýirinde bastalǵan sot prosesi eki aıǵa jýyq ýaqytqa sozyldy. İs aıasynda 40-tan astam sot saraptamasy jasalyp, 200-ge jýyq kýágerden jaýap alynǵan. Tergeý barysynda 8 beınematerıal taldanyp, kúdiktilermen bettestirý men oqıǵa ornyna tekserý júrgizilgen.

3 maýsym kúni sottalýshylar sońǵy sózin aıtty. Aıyptalýshy Nurbol Toqtaýbaev toptyń arasynda bolǵanyn moıyndap, eshkimge qol kótermegenin aıtty. Shyńǵys Belǵojaev tergeýde aty atalǵan Qarjaýbaıdy kúdikti retinde tanýdy surady. Nurqıas İlıasov Ǵaıypbaevty urǵanyn moıyndap, biraq Sherzatqa qol tıgizbegenin aıtty. Dıdar Qalıahmet ózin kinásizbin dep eseptese, basty aıyptalýshy Abzal Shynasyl da óz kinásin joqqa shyǵardy. Ol tek Ǵaıypbaevty pyshaqtaǵanyn, al Sherzatpen betpe-bet kelmegenin málimdedi.

Bul is qoǵamda úlken rezonans týdyrǵan bolatyn. Memlekettik aıyptaýshy barlyq aıyptalýshylardy kináli dep tanýdy jáne olarǵa qatań jaza taǵaıyndaýdy suraǵan.