Shyǵys Qazaqstan oblysynda polısıa qyzmetkeri oılanbastan káriz qudyǵyna túsip, eki jumysshyny qutqardy, dep habarlaıdy infohub.kz.
Oblystyq polısıa departamenti baspasóz qyzmetiniń málimetinshe, 20 tamyzda saǵat 14:30 shamasynda «Molodejnyı» komýnaldyq memlekettik kásipornynyń 1985 jyly týǵan eki qyzmetkeri Ulan aýdany Qasym Qaısenov kentindegi №11 úıdiń janynda káriz qubyrlaryn tazalap júrgen.
Jumys barysynda er adamdardyń biri káriz lúkine túsip, esin joǵaltqan. Áriptesine kómektespek bolǵan ekinshi jumysshy da sońynan túsken, alaıda ol da esin joǵaltqan.
Bolǵan jaǵdaıdy Ulan aýdanynyń krımınalısi, polısıa kapıtany Aset Naǵashbaev baıqap qalǵan. Ol mańaıdaǵy lúk mańynda adamdardy kórip, dabyl qaqqan daýystardy estip, bul týraly ýchaskelik ınspektorǵa dereý habarlaǵan.
Oqıǵa ornyna polısıa maıory Nurdáýlet Tótepov kelgen. Ár sekýndtyń mańyzdy ekenin túsingen ol birden arqan surap, ony bekitip, lúkke túsken.
«Ózin qaýipke tikkenin bile tura, polıseı toqtap qalmady. Birneshe mınýt ishinde ol aldymen bir jumysshynyń, sodan keıin ekinshisiniń jer betine shyǵýyna kómektesti. Osydan keıin ekeýin de kelgen jedel járdem brıgadasyna tapsyrdy», — dep habarlady Shyǵys Qazaqstan oblysy polısıa departamentinde.
Polısıa kapıtany Aset Naǵashbaevtyń sergektigi men polısıa maıory Nurdáýlet Tótepovtiń batyl áreketiniń arqasynda qaıǵyly oqıǵanyń aldyn alý múmkin boldy.