Shvesıada jeksenbide ótken parlament saılaýynyń aldyn ala qorytyndysy boıynsha bıleýshi solshyl blok pen ońshyl opozısıa blogy birdeı daýys jınady. Daýystardy sanaý áli jalǵasyp jatqanyn infohub.kz saıty habarlaıdy.
Aralyq nátıjelerge qaraǵanda, Shvesıa demokrattary partıasy 2010 jyly parlamentke kirgeli beri alǵash ret qoldaýdan aıyrylyp barady. Shvesıada ońshyl tórt partıa men solshyl tórt partıadan turatyn eki iri saıası blok bar, sondyqtan koalısıalyq jáne azshylyq úkimetteri jıi qurylady.
Jeksenbi kúni keshke premer-mınıstr Magdalena Andersson jaqtastaryn túpkilikti nátıjeni kútýge shaqyrdy, alaıda qazirgi nátıje saqtalsa, «Shvesıada jańa úkimet bolady» dep qosty.
Onyń partıasy — sosıal-demokrattar — Ekinshi dúnıejúzilik soǵys aıaqtalǵannan beri Shvesıa saıasatyndaǵy basty kúsh bolyp keledi.
Al 1980 jyldary nasıstik kózqarastaǵy adamdar qurǵan Shvesıa demokrattary uzaq jyldar boıy oqshaýlanyp keldi. 2022 jyly ol qylmys pen ımıgrasıa máselelerin kóterip, eldegi ekinshi úlken partıaǵa aınaldy.
Jeksenbide daýys bergen soń Andersson shvesıalyqtardyń aldyndaǵy tańdaýdy bylaısha túsindirdi: «Bizde buryn-sońdy bolmaǵan, tolyǵymen Shvesıa demokrattary baqylaıtyn úkimet bolýy kerek pe? Álde men basqaratyn, Shvesıany jańa yntymaqtastyq rýhynda baǵyttaıtyn úkimet bolýy kerek pe?»
Óz kezeginde Ýlf Krıstersson ózi men onyń alánsy jumysyn jalǵastyra alýy mańyzdy ekenin aıtty. Ol óziniń týǵan mýnısıpalıteti Strengneste daýys bergen soń: «Bizdiń mańyzdy jumysymyzdy jalǵastyra alýymyzǵa shynaıy qulshynys bar dep oılaımyn», — dedi.
Saılaý naýqanynda ulttyq qaýipsizdik, bandalyq qylmys jáne áleýmettik shyǵyndar basty taqyrypqa aınaldy.