Shyǵys Qazaqstan oblysynda ákimniń jańa orynbasary taǵaıyndaldy. Ol — buǵan deıin Altaı aýdanynyń ákimi qyzmetin atqarǵan Renat Qurmambaev, dep habarlaıdy infohub.kz saıty.
Oblys ákimdiginiń málimetinshe, Renat Tleýhanuly aýyl sharýashylyǵy, veterınarıa, jer qatynastary jáne tabıǵat paıdalaný máselelerine jetekshilik etetin bolady.
Renat Qurmambaev 1980 jyly 25 qańtarda Úlken Narym aýdanynyń Novo-Berezovka aýylynda dúnıege kelgen. 1998 jyly Shyǵys Qazaqstan gýmanıtarlyq kolejin «Eńbek oqytý» mamandyǵy boıynsha, 2001 jyly Shyǵys Qazaqstan memlekettik ýnıversıtetin «Aýyl sharýashylyǵy óndirisin mehanıkalandyrý boıynsha kásiptik oqytý» mamandyǵy boıynsha, al 2006 jyly Qazaqstan-Amerıka erkin ýnıversıtetin «Quqyqtaný» mamandyǵy boıynsha bitirgen.
Memlekettik qyzmettegi eńbek jolyn 2003 jyly Katonqaraǵaı aýdandyq mádenıet bóliminiń jastarmen jumys jónindegi bas mamany bolyp bastaǵan. 2005 jyly Katonqaraǵaı aýdanynyń ishki saıasat, mádenıet jáne tilderdi damytý bóliminiń bas mamany bolyp jumys istegen. 2005-2008 jyldary Katonqaraǵaı aýdany ákimi apparatynyń kadrlyq jáne memlekettik-quqyqtyq jumys bóliminiń meńgerýshisi qyzmetin atqarǵan.
2008-2009 jyldary Katonqaraǵaı aýdany ákimi apparatynyń uıymdastyrý-kadrlyq bólimin basqarǵan. 2009-2011 jyldary Shyǵys Qazaqstan oblysy ákimi apparatynyń uıymdastyrý-ınspektorlyq bóliminiń bas ınspektory bolyp qyzmet etken.
Ár jyldary Katonqaraǵaı jáne Ulan aýdandarynyń ákimi, SHQO ákimi apparaty basshysynyń orynbasary jáne Altaı aýdany ákiminiń orynbasary qyzmetterin atqarǵan. 2023 jyldyń qarashasynan bastap osy ýaqytqa deıin Altaı aýdanynyń ákimi bolǵan.