Shyǵys Qazaqstan oblysynda tabıǵı órtti joıý jumystary jalǵasýda. Ot qurǵaq shópti, aǵashtardy jáne orman tósenishin sharpydy, dep habarlaıdy infohub.kz saıty.
Tótenshe jaǵdaılar mınıstrligi baspasóz qyzmetiniń málimetinshe, oblystyń Ulan aýdanyndaǵy «Asý-Bulaq orman sharýashylyǵy» komýnaldyq memlekettik mekemesiniń aýmaǵynda tabıǵı órtti sóndirý jumystary jalǵasýda. Ot qurǵaq shópti, aǵashtardy jáne orman tósenishin sharpyǵan.
Vedomstvonyń aıtýynsha, órtti sóndirýge jeldiń aýyspaly baǵyty, tik betkeıler, aýa temperatýrasynyń joǵary bolýy jáne kireberis joldardyń bolmaýy qıyndyq týdyrýda. Kúshter men quraldardy jedel basqarý úshin oqıǵa ornynda oblystyq Tótenshe jaǵdaılar departamentiniń bastyǵy ornalasqan shtab quryldy. Shtab barlyq tartylǵan qyzmetterdiń is-qımylyn úılestirip, jerústi jáne áýe toptarynyń ózara is-qımylyn qamtamasyz etip, órtti odan ári joıý boıynsha sheshimder qabyldaıdy.
Órtti sóndirýge TJM, Ekologıa jáne tabıǵı resýrstar mınıstrliginiń «Qazavıaormanqorǵaý», Ulttyq qaýipsizdik komıteti departamenti jáne jergilikti atqarýshy organdardyń kúshteri men quraldary — shamamen 220 adam jáne 43 tehnıka, sondaı-aq TJM-niń bes «Qazavıaqutqarý» tikushaǵy, Shyǵys Qazaqstan oblysy ákimdiginiń jáne UQK departamentiniń avıasıasy tartyldy.
Qıyn jetetin ýchaskelerde TJM tikushaqtary, oblys ákimdiginiń jáne UQK departamentiniń avıasıasy sý quıatyn qurylǵylarmen jumys isteıdi. Qazirgi ýaqytta 100 túsirý jasalyp, 288 tonna sý tógildi, dep habarlady vedomstvoda.