Shymkent áýejaıynda mas jolaýshy óz júginde jarylǵysh qurylǵy bar dep málimdep, reısten túsirilip, bes táýlikke ákimshilik qamaýǵa alyndy, dep habarlaıdy infohub.kz saıty.
NUR.KZ-tiń Polisia.kz-ke silteme jasap habarlaýynsha, oqıǵa Shymkent — Astana reısine tirkelý kezinde bolǵan. İshimdik ishken er adam júginde «jarylǵysh qurylǵy» bar ekenin aıtqan.
Áýekompanıa ókilderi jolaýshyny dereý reısten túsirip, kóliktegi polısıa bóliminiń qyzmetkerlerine tapsyrdy. Tekserý barysynda kólik polıseıleri aqparattyń rastalmaǵanyn anyqtady — eshqandaı jarylǵysh qurylǵy tabylǵan joq. Áýejaıda evakýasıa júrgizilgen joq.
Tekserý qorytyndysy boıynsha er adam qoǵamdyq orynda mas kúıinde júrý jáne usaq buzaqylyq jasaǵany úshin jaýapkershilikke tartyldy. Sot sheshimimen oǵan 5 táýlik ákimshilik qamaý taǵaıyndaldy.
«Áýejaılar men kólik nysandarynda jarylǵysh qurylǵylar men ózge de qaýipsizdikke tónetin qaterler týraly ázildesý — ázildesýge negiz emes. Adam zıan keltirýdi oılamaǵan bolsa da, mundaı málimdemeni «ázilge» aıtsa da, ondaı sózder zańda belgilengen tártippen qaralyp, jaýapkershilikke ákep soǵady», — delingen habarlamada.