17 tamyz keshke Shymkentte jasóspirim pyshaq jaraqatyn alǵan oqıǵa boldy. Qalalyq dendrosaıabaqqa kire beristegi fýdtrak mańynda janjal shyqqan, dep habarlaıdy infohub.kz saıty.
Qumash.kz basylymynyń málimetinshe, áleýmettik jelilerde oqıǵa ornynan fotosýretter paıda bolǵan. Jarıalanym avtory janjalǵa qatysýshylar fýdtraktyń kámeletke tolmaǵan qyzmetkerleri bolǵanyn aıtady. Habarlamada: «Keshke Shymkenttegi dendrosaıabaqqa baryp, osyndaı kórinisti kórdik. Kire beristegi kasanyń qasynda fýdtrak qyzmetkerleri bir-birin pyshaqpen aıaǵynan jaralady. Bul ne degen zańsyzdyq, ata-analary men basshylyǵy qaıda qarap otyr?» delingen.
Shymkent polısıa departamenti oqıǵa faktisin rastap, sotqa deıingi tergeý bastalǵanyn habarlady. Vedomstvo: «Dene jaraqatyn keltirý faktisi boıynsha qylmystyq is qozǵaldy. Oqıǵaǵa qatysýshylar anyqtaldy. Jaraqat alǵan jasóspirim aýrýhanaǵa jetkizildi. Qazirgi ýaqytta oqıǵanyń barlyq mán-jaıy, onyń ishinde janjaldyń sebepteri anyqtalýda», — dep málimdedi.
Sonymen qatar, polısıa kámeletke tolmaǵandardyń zańdy ókilderin jaýapkershilikke tartý máselesin qarastyryp jatyr.
Buǵan deıin Soltústik Qazaqstan oblysynda mas kúıindegi er adam medısınalyq kýálandyrýǵa aparý kezinde ýchaskelik ınspektorǵa pyshaqpen shabýyl jasaǵany habarlanǵan bolatyn. Polıseı qoıylǵan jaraqat alǵanymen, kúdiktini qarýsyzdandyryp, kólikti toqtata alǵan. Fakti boıynsha qylmystyq is qozǵalyp, fıgýrant ýaqytsha ustaý ızolátoryna qamaldy.