2024 jyldyń sáýir aıynda Shymkent áýejaıynda FlyArystam áýekompanıasynyń Almatydan ushyp kelgen ushaǵy qoný kezinde ushý-qoný jolaǵyna kirgen jabaıy janýardy qaǵyp ketti. Oqıǵa №55652 áskerı bóliminiń jaýapkershilik aımaǵyndaǵy perımetrlik qorshaýdyń tıisti deńgeıde bolmaýynan oryn aldy, dep habarlaıdy infohub.kz saıty.
Bastapqyda ushaq ıtti qaǵyp ketkeni habarlandy, alaıda júrgizilgen tergeý janýardyń jabaıy — boljam boıynsha shaqal ekenin kórsetti. Soqtyǵysý saldarynan áýe kemesiniń bólshekteri zaqymdandy.
«Komısıa avıasıalyq oqıǵanyń sebebi — №55652 áskerı bóliminiń jaýapkershilik aımaǵyndaǵy perımetrlik qorshaýdyń bútindigin tıisti deńgeıde qamtamasyz etpeýi degen qorytyndyǵa keldi. Tergeý nátıjesinde jabaıy janýardyń (boljam boıynsha shaqaldyń) ushý alańyna kedergisiz kirip ketýine múmkindik bergen tesikter anyqtaldy. Onyń qozǵalý baǵyty soltústikten ońtústikke qaraı boldy. Bul oqıǵaǵa jol bergeni úshin jaýapkershilik áskerı bólimniń laýazymdy tulǵalaryna júkteldi», — dep habarlady «Shymkent Áýejaıy» AQ basqarma tóraǵasynyń mindetin atqarýshy Alık Ganeev.
Áskerılerge óz jaýapkershilik aımaǵyndaǵy qorshaýdy qaýipsizdik talaptaryna saı keltirý, janýarlar men bógde adamdardyń aerodrom aýmaǵyna kirýine jol bermeý usynyldy.
Qazaqstannyń Avıasıalyq ákimshiligi №55652 áskerı bóliminiń jaýapkershilik aımaǵyndaǵy qorshaýdyń bir bóligi kúzet jaryǵy, beınebaqylaý júıesi jáne qazýǵa qarsy qurylǵynyń bolmaýy turǵysynan avıasıalyq qaýipsizdik talaptaryna saı kelmegenin atap ótti. Eskertýler áli kúnge deıin joıylmaǵan, onyń sebepteri obektıvti, onyń ishinde Qazaqstan Respýblıkasy Qorǵanys mınıstrliginiń qarjylandyrý máseleleri de bar. Sonymen birge vedomstvoda Shymkent áýejaıynyń jaýapkershilik aımaǵyndaǵy perımetrlik qorshaýdyń jaramdy kúıde ekendigin, anyqtalǵan tesikterdiń jabylǵanyn aıtty.