Shymkentte burynǵy «syra patshasy» ári eks-olıgarh Toqtar Tóleshovke tıesili jeke úı men jer telimi aýksıonǵa qoıyldy, dep habarlaıdy infohub.kz.
QR elektrondy saýda portalynyń dereginshe, lottyń bastapqy baǵasy — 240 195 000 teńge, alaıda obektini satýǵa daıyn eń tómengi baǵa — 40 mln teńge. Qujattarda aýmaqtyń menshik ıesi Tóleshov Toqtar Júsipuly ekeni kórsetilgen. Múlikti jarǵylyq kapıtalǵa engizý shartynda «Shymkentpıvo» JSHS jáne «Darhan Group» JSHS de atalady.
Lotty «Darhan Group» JSHS ornalastyrǵan. Jer teliminiń aýdany — 0,0644 ga, aýmaqta eki turǵyn ǵımarat jáne qora bar. Saýda-sattyq golandıalyq ádispen (baǵany tómendetý arqyly) ótedi. Aýksıon 27 tamyzda saǵat 10:00-de bastalady.
Eske salaıyq, Toqtar Tóleshov 2016 jyly qatań rejımdegi kolonıada 21 jylǵa bas bostandyǵynan aıyrylǵan, sondaı-aq komersıalyq jáne qoǵamdyq uıymdarda basshylyq qyzmetterdi atqarý quqyǵynan ómir boıy aıyrylǵan. Ol memlekettik tóńkeris jasaýǵa árekettený, azaptaý, kisi óltirý — barlyǵy 18 qylmys jasady dep aıyptalǵan. Tóleshov 2016 jyldyń qańtar aıynyń sońynda Shymkentte arnaıy operasıa kezinde ustalǵan.