Joǵary synyp oqýshylaryna arnalǵan jıyntyq baǵalaýdy toqtatý máselesi áli ashyq kúıinde tur. Oqý-aǵartý birinshi vıse-mınıstri Shynar Aqparova úkimettegi brıfıńte oqýshylardyń bilimin baǵalaý júıesinde ne ózgeretinin túsindirdi, dep habarlaıdy infohub.kz.
Jýrnalıser nelikten SOR men SOCh tek 2-4 synyp oqýshylary úshin toqtatylyp, júkteme joǵary bolǵanyna qaramastan 5-11 synyptarda saqtalyp otyrǵanyn surady. Olar joǵary synyp oqýshylaryna mundaı jumystardyń sanyn azaıtý múmkindigi qarastyrylǵanyn bilgisi keldi. Alaıda naqty jaýap berilmedi.
Shynar Aqparova tek bastaýysh býyndaǵy ózgeristerge toqtaldy. «Krıterıaldy baǵalaý toqtatylmaıdy — biz qazir tek krıterıaldy baǵalaý tásilin ózgertip jatyrmyz. Buryn bastaýysh býynda ár bólimnen keıin SOR tapsyryp, toqsan sońynda taǵy SOCh tapsyratyn bolsa, endi balalar toqsandyq jumystardy tapsyrmaıdy. Iaǵnı formatıvti baǵalaý qalady — 1-den 10 balǵa deıin. Jalǵyz aıyrmashylyq — ár bólimnen keıin aralyq baǵalaý bolady. Qorytyndyda formatıvti baǵalaý nátıjeleri men aralyq baǵalaý nátıjeleri qosylyp, toqsandyq qorytyndy shyǵady. Iaǵnı, biz júktemeni azaıtyp jatyrmyz», — dedi ol.
Onyń aıtýynsha, jazbasha jumystarǵa basymdyq beriledi. Al joǵary synyp oqýshylaryna keler bolsaq, jańa pánder — «Konstıtýsıa negizderi», «Zań jáne tártip» jáne «Qaýipsizdik negizderi» boıynsha baǵa qoıylmaıdy, sebebi olar varıatıvti komponent aıasynda ótkiziledi.
Eske salaıyq, 26 mamyrda Oqý-aǵartý mınıstri Juldyz Súleımenova qazaqstandyq mektepterde SOR men SOCH-tan birtindep bas tartýy múmkin ekenin málimdegen edi. Jaqynda olardyń tek 2-4 synyptarda toqtatylatyny belgili boldy. Oqýshylardyń oqý jetistikteri formatıvti baǵalaý, taqyryptyq jáne qorytyndy baqylaý arqyly baǵalanatyn bolady.