Almaty taýlaryna shyqqan eki jasóspirim belgilengen ýaqytta habarlaspaǵan. Qutqarýshylar olardy Aıýsaı shatqalynan taýyp, ata-analaryna tapsyrdy, dep habarlaıdy infohub.kz.
Oqıǵa Almatynyń Bostandyq aýdanynda, Úlken Almaty shyńy mańynda, teńiz deńgeıinen shamamen 3680 metr bıiktikte bolǵan. Jasóspirimder ýaǵdalasqan ýaqytta úıge oralmaǵan soń, qutqarýshylarǵa habar túsken.
Anyqtalǵandaı, túnde jasóspirimder taýǵa shyǵyp, sol kúni qaıtýdy josparlaǵan. Alaıda belgilengen ýaqytta olar kórinbegen, baılanys bolmaǵan, geolokasıa derekterin alý múmkin bolmaǵan.
TJM baspasóz qyzmeti: "Monıtorıń jáne jedel áreket etý ortalyǵynyń qutqarýshylary dereý izdestirý-qutqarý jumystaryna kiristi. İzdeý barysynda jasóspirimder Aıýsaı shatqalynan tabyldy", — dep málimdedi.
Mamandar olardy taýly aımaqtan alyp shyǵyp, ata-analaryna tapsyrdy. Medısınalyq kómek qajet bolmady.
Vedomstvo eskertedi: "Taýǵa shyǵar aldynda marshrýtty aldyn ala zerttep, aýa raıy men jer bederiniń kúrdeliligin eskerińiz. Jaqyndaryńyzǵa marshrýt pen qaıtý ýaqytyn habarlańyz, telefondy zarádtap alyńyz jáne jalǵyz taýǵa shyqpańyz. Tótenshe jaǵdaıda 112 nómirine qońyraý shalyńyz".