Qazaqstan Respýblıkasy Týrızm jáne sport mınıstrligi Sport jáne dene shynyqtyrý isteri komıteti «Astana» basketbol klýbynyń qyzmetin toqtatýyna qatysty resmı málimdeme jasady, dep habarlaıdy infohub.kz.
Vedomstvo sońǵy jyldary klýbtyń halyqaralyq arenadaǵy nátıjeleri qoıylǵan mindetter men kútken úmitterge saı bolmaǵanyn atap ótti. Ótken maýsymda Biryńǵaı VTB lıgasynda «Astana» 44 oıynnyń tek ekeýinde jeńiske jetip, sońǵy 12-orynǵa turaqtady. Jeńilis paıyzy 95%-dan asty, bul klýbtyń lıgadaǵy búkil tarıhyndaǵy eń nashar kórsetkish boldy. Sonymen qatar, komanda segiz jyl boıy bul týrnırdiń pleı-off kezeńine shyǵa almady.
Komıtette sondaı-aq ishki arenada «Astana» basketbol klýby da qoıylǵan maqsattarǵa jete almaı, Qazaqstan Kýbogy úshin kúreste jeńilip, Ulttyq lıgada chempıon ataǵyn ıelene almaǵanyn qosty.
Vedomstvo ótken jyly sportty qarjylandyrý tıimdiligin arttyrýdy kózdeıtin Qazaqstan Respýblıkasynyń Zańy qabyldanǵanyn eske saldy. Onyń negizgi erejeleri ulttyq qurama komandalardy basym damytýǵa, sport rezervin qalyptastyrýǵa, sondaı-aq búdjet qarajaty esebinen legıonerlerdi qarjylandyrýǵa tyıym salýǵa baǵyttalǵan.
Qalyptasqan jaǵdaıda otandyq basketboldy damytý tásilderin qaıta qaraý múmkindigi qarastyrylýda. Basymdyq jastar komandasyn damytýǵa, sport rezervin daıyndaýǵa jáne balalar men jasóspirimder sportyn qoldaýǵa beriledi.
Buǵan deıin «Astana» kásibı basketbol klýbynyń oıynshylary negizgi komandanyń jabylýy týraly sheshimnen keıin málimdeme jasaǵan bolatyn. Sondaı-aq BAQ-ta klýbtyń búdjet tapshylyǵyna baılanysty Biryńǵaı VTB lıgasynda óner kórsetpeıtini týraly aqparat paıda boldy.