Starlink spýtnıktik ınternetimen jabdyqtalǵan jolaýshylar poıyzy Nurly jol — Arqalyq baǵytynda jyl sońyna deıin qatynaýdy jalǵastyrady, dep habarlaıdy infohub.kz saıty.
Ulttyq temirjol tasymaldaýshysy №225/226 Nurly jol — Arqalyq poıyzynyń qatynaý merzimin 2026 jyldyń sońyna deıin uzartý týraly sheshim qabyldady. Bul jolaýshylar suranysyn qanaǵattandyrý, Aqmola jáne Qostanaı oblystary turǵyndarynyń kóliktik qoljetimdiligin qamtamasyz etý, sondaı-aq jolaýshylardy tasymaldaýǵa qolaıly jaǵdaı jasaý maqsatynda jasaldy.
Alǵashynda poıyz jolaýshylar aǵynyn zerdeleý úshin tamyz aıynyń sońyna deıin synaq rejıminde taǵaıyndalǵan bolatyn. Azamattardyń ótinishterin qarap, naqty suranysty eskere otyryp, onyń qatynaý merzimin jyl sońyna deıin uzartý týraly sheshim qabyldandy. Reıstiń ereksheligi — Starlink tehnologıasy negizinde spýtnıktik ınternettiń iske qosylýy. Sonymen qatar, yńǵaıly keste jolaýshylarǵa aımaqtar arasyndaǵy saparlaryn jaıly josparlaýǵa múmkindik beredi. Jalpy, baǵytty uzartý turaqty kólik baılanysyn qamtamasyz etýge jáne jolaýshylar tasymalynyń sapasy men qoljetimdiligin arttyrýǵa baǵyttalǵan, — dep atap ótti «Jolaýshylar tasymaly» AQ basqarma tóraǵasy Ánýar Ahmetjanov.
Jolaýshylardy tasymaldaý 2024 jyly shyǵarylǵan RWS Wagon vagondarymen júzege asyrylady. Poıyz quramynda bir baǵytta 250-den astam jolaýshyny tasymaldaýǵa eseptelgen úsh kýpelik jáne úsh plaskart vagony bar. Vagondar qaýipsizdik, senimdilik jáne jaılylyqqa qoıylatyn zamanaýı halyqaralyq talaptardy eskere otyryp jasalǵan. Kýpelerde ergonomıkalyq uıyqtaıtyn oryndar, jeke jaryqdıodty shamdar, USB-porttar jáne jelilik rozetkalar ornatylǵan. Vagondardyń qyzmet etý merzimi — 40 jylǵa deıin, — dep qosty baspasóz qyzmeti.
Poıyz kún aralatyp qatynaıdy. Jol boıynda ol Nurly jol, Jaltyr, Atbasar, Jaqsy, Esil, Derjavınskaıa, Arqalyq jáne basqa da stansıalarda toqtaıdy.