Almaty turǵyny páterin merziminde ári sapasyz jóndegen merdigerge qarsy sotqa júgindi. İstiń mán-jaıyn infohub.kz saıty habarlaıdy.
Jambyl oblysy sottarynyń baspasóz qyzmetiniń málimetinshe, sot azamatsha M.-nyń jeke kásipkerge qatysty qurylys merdigerlik shartyn buzý jáne aqsha qarajatyn óndirip alý týraly talabyn qanaǵattandyrǵan.
2025 jyldyń qazan aıynda taraptar arasynda Almatydaǵy páterde jóndeý jumystaryn júrgizýge kelisimshart jasalǵan. Jóndeý quny 6,2 mln teńgeni quraǵan. Talapker jaýapkerge jumystyń alǵashqy úsh kezeńi úshin 4,7 mln teńge tólegen. Alaıda jóndeý tolyq kólemde oryndalmaǵan, al jumys sapasy men qoldanylǵan materıaldar kelisimshart talaptaryna sáıkes kelmegen.
Páter ıesi kemshilikterdi joıýdy birneshe ret talap etken, biraq nátıje bolmaǵan. Sot derekterine sáıkes, keıin merdigerdiń páterge kirýi toqtatylyp, sharttyq qatynastar is júzinde aıaqtalǵan.
Jaýapker talapty moıyndamaı, jumystyń bir bóligi oryndalǵanyn, al páterge kirý múmkindigi bolmaǵandyqtan jóndeýdi aıaqtaı almaǵanyn málimdegen.
Saraptama qorytyndysy boıynsha, naqty oryndalǵan jumystar men materıaldardyń quny 1,4 mln teńgeni quraǵan. Barlyq bólmelerdegi plıtkany buzyp, tolyq aýystyrý quny 760 myń teńgege baǵalanǵan.
Sot merdigerdiń kelisimshartty eleýli túrde buzǵanyn, sonyń saldarynan talapker shart jasasý kezinde kútken nátıjeden aıyrylǵanyn anyqtaǵan.
Sot sheshimimen kelisimshart buzylǵan. Jaýapkerden talapkerdiń paıdasyna 3,9 mln teńge, notarıattyq jáne ókildik shyǵyndar, sondaı-aq saraptama shyǵyndary jalpy somasy 385 myń teńge óndirilgen.