Elimizdiń túkpir-túkpirindegi kásibı sýretshiler Almatyǵa arnalǵan jańa respýblıkalyq baıqaýda 10,5 mln teńgelik júlde qory úshin baq synaı alady. Arnaıy bilimi bar kez kelgen adam jasyna, ultyna jáne turǵylyqty jerine qaramastan qatysa alady, dep habarlaıdy infohub.kz saıty.
«Ajarly Almaty!» atty baıqaý shyǵarmashyl adamdardy qoldap, ońtústik astananyń tarıhı, mádenı jáne tabıǵı kelbetin óner týyndylary arqyly nasıhattaýdy kózdeıdi. Uıymdastyrýshylar buryn kórmege qoıylmaǵan, basqa baıqaýlarǵa qatyspaǵan jáne jarıalanbaǵan túpnusqa avtorlyq jumystardy kútedi.
Týyndylar úsh taqyryptyń birine arnalýy tıis: Almatynyń tarıhı jáne qazirgi kelbeti; qalanyń tabıǵaty, kórikti jerleri men sáýlet murasy; Almatynyń mádenıeti, óneri jáne qoǵamdyq ómiri. Qatysýshylar keskindeme (maıly boıaý, akrıl, tempera, akvarel), grafıka nemese aralas tehnıka janrynda jumys usyna alady. Týyndynyń eń kishi ólshemi — 70 × 80 sm.
Jeńimpazdarǵa mynadaı júldeler beriledi: birinshi oryn — 3 mln teńge; ekinshi oryn — árqaısysy 2 mln teńgeden eki jeńimpaz; úshinshi oryn — árqaısysy 1 mln teńgeden eki jeńimpaz; sondaı-aq 300 myń teńgeden bes yntalandyrý syılyǵy qarastyrylǵan. Marapattaý rásimi qyrkúıek aıynda Almaty qalasy kúnine oraı ótedi, al úzdik jumystar qorytyndy kórmege qoıylady. Ótinimder 2026 jyldyń 7 tamyzy men 7 qyrkúıegi aralyǵynda qabyldanady.