Abaı oblysynyń Kókpekti aýdanynda úsh ýchaskede tabıǵı órtti sóndirý jumystary jalǵasýda. Órtti joıýǵa TJM men jergilikti atqarýshy organdardyń shamamen 180 adamy men 26 tehnıkasy jumyldyryldy, dep habarlaıdy infohub.kz saıty.
Sondaı-aq, sý tógetin qurylǵysy bar TJM «Qazavıaqutqarý» tikushaǵy órt sóndirýge tartyldy. Avıasıa 22 túsirilim jasap, 66 tonna sý jumsady.
«Órtti sóndirýge qatty jel, kúrdeli jer bederi jáne qurǵaq ósimdikter kedergi keltirýde. Qutqarýshylar men tartylǵan kúshter jekelegen órt oshaqtaryn joıý jumystaryn jalǵastyrýda», — dep habarlady TJM.
Vedomstvo mamandardyń jaǵdaıdy únemi baqylap, órttiń odan ári taralýyna jol bermeý úshin sharalar qabyldap jatqanyn qosty.
«Jaǵdaı TJM baqylaýynda», — dep atap ótti qutqarýshylar.
Al Qaraǵandy oblysynyń Qarqaraly aýdanynda Jańatóǵan aýylynyń mańyndaǵy tabıǵı órtti oqshaýlaý múmkin boldy. Órt taýly-dalaly jerde bolǵan. Ony sóndirýge TJM bólimsheleriniń, jergilikti atqarýshy organdardyń jáne erikti quramalardyń 153 adamy men 51 tehnıkasy jumyldyryldy.
«Qazirgi ýaqytta jekelegen tútindeý oshaqtaryn joıý jáne aýmaqty kúzetý jumystary jalǵasýda», — dedi TJM ókilderi.
Eldi mekenderge qaýip joq. Órt tolyq joıylǵansha jumystar jalǵasady.
Aldyńǵy kúni tótenshe jaǵdaılar vıse-mınıstri Ramıl Kamalov, Qaraǵandy oblysy TJD bastyǵy Marǵulan Amanbaev jáne oblys ákiminiń orynbasary Rýslan Kenjebekov aımaqta 11 tamyzdan beri sóndirilip jatqan tabıǵı órt aýmaǵyn áýeden tekserdi. Ushý qorytyndysy boıynsha kúshter men tehnıka qaıta bólindi.