Taılandtyń ońtústiginde ótken mach kezinde 24 jastaǵy fýtbolshy naızaǵaı soǵýynan qaza tapty, taǵy 12 adam zardap shekti, dep habarlaıdy infohub.kz.
Qaıǵyly oqıǵa Taılandtyń ońtústik provınsıasyndaǵy Sýngaı-Kolok qalasyndaǵy Santiphap stadıonynda boldy. Oıyn kezinde alańǵa naızaǵaı túsip, oıynshylardyń biri mert boldy, al taǵy 12 adam jaraqat aldy.
Qaza tapqan — SAMCOLTS komandasynyń 24 jastaǵy vıngeri Sofvan Avae. The Independent basylymynyń habarlaýynsha, oǵan dereý medısınalyq kómek kórsetilgenine qaramastan, ony aman alyp qalý múmkin bolmady.
Zardap shekkenderdiń arasynda Malaızıa azamaty da bar, olar aýrýhanaǵa jetkizildi. Oqıǵa SAMCOLTS jáne Abu x Nong Sirin komandalary arasyndaǵy Golok FA Kýbogynyń machy kezinde boldy.
Áleýmettik jelilerde oqıǵa ornynan vıdeo tarady. Vıdeoda naızaǵaıdyń birneshe fýtbolshynyń janyna túskeni jáne qatty jarylys bolǵany kórinedi. Komandalastary dereý júrek-ókpe reanımasıasyn jasaýǵa tyrysty, biraq oıynshyny qutqara almady.
Basylym Taılandta mundaı jaǵdaılar jıi bolyp turatynyn atap ótedi. Resmı derekter boıynsha, 2020-2024 jyldary elde naızaǵaı soǵýynan 283 adam zardap shekken. Sol kúni Úndistanda da osyǵan uqsas qaıǵyly oqıǵa bolyp, naızaǵaıdan 14 adam qaza tapty.